શેરબજારમાં રોકાણ કરવાનું કહી રૂ.૧.૮૧ કરોડની કરાઈ છેતરપિંડી

Author: નોબત સમાચાર

શેરબજારમાં રોકાણ કરવાનું કહી રૂ.૧.૮૧ કરોડની કરાઈ છેતરપિંડી

વોટ્સએપમાં ફેક એપ્લિકેશન બતાવી આચરાયું કૃત્યઃ

જામનગર તા.૧૫ : જામનગરના એક આસામીને વોટ્સએપ પર શેરબજારમાં રોકાણ કરવાનું પ્રલોભન આપી એક ફેક એપ્લિકેશનના કહેવાતા મેનેજર તથા તેના સાગરિતને રૂ.૧,૮૧,૦૦૦૦૦ની રકમ બેંક ખાતાઓમાં ઓનલાઈન ટ્રાન્સફર કરાવી છેતરપિંડી કરતા સાયબર ક્રાઈમ પોલીસ સ્ટેશનમાં ફરિયાદ કરાઈ છે.

જામનગરના ભાગોળે આવેલી સમર્પણ હોસ્પિટલ નજીક સિધ્ધનાથ સોસાયટીમાં રહેતા ગજેન્દ્રગીરી હરનામ ગીરી ગોસ્વામી નામના પંચાવન વર્ષના પ્રૌઢને ગયા સપ્ટેમ્બર મહિનામાં એક અજાણ્યા મોબાઈલ નંબર પરથી વોટ્સએપમાં મેસેજ આવ્યા પછી એક શખ્સે કોઝવે નામની એપ્લિકેશન સેબી અને યુએસ એક્સચેન્જ માન્ય એપ્લિકેશન હોવાનું જણાવી શેરમાં રોકાણ કરવા માટે લખાણ દર્શાવ્યું હતું.

તે લખાણ જોયા પછી ગજેન્દ્રગીરીએ તેમાં રસ દાખવતા એક વોટ્સએપ ગ્રુપમાં તેઓને એડ કરવામાં આવ્યા હતા અને તે પછી એપ્લિકેશનના માધ્યમથી તા.૩૦ સપ્ટેમ્બરથી તા.૨૩ ઓક્ટોબર સુધીના સમયમાં ગજેન્દ્રગીરીને શેરમાં રોકાણ કરવાનું કહી જુદા જુદા બેંક ખાતાઓમાં રૂ.૧,૮૧,૦૦૦૦૦ જમા કરાવ્યા હતા તે દરમિયાન એપ્લિકેશનના મેનેજર રાજલાલ વસાણી તથા અન્ય એક શખ્સ જતીન વર્મા કે જેણે જુદા જુદા ચાર નંબર પરથી ગજેન્દ્રગીરી સાથે વાત કરી હતી આ બંને શખ્સે લાલચ બતાવી ગજેન્દ્રગીરી પાસેથી રૂપિયા ૧,૮૧,૦૦૦૦૦ મેળવી લીધા પછી તેનું વળતર કે મૂળ રકમ પરત ન આપતા ગજેન્દ્ર ગીરીએ પોતાની સાથે છેતરપિંડી થઈ હોવાનો અહેસાસ અનુભવ્યો હતો જેના પગલે તેઓએ સાઇબર ક્રાઇમ પોલીસ સ્ટેશનનો સંપર્ક કર્યા પછી સોમવારે સાયબર ક્રાઇમ પોલીસ સ્ટેશનમાં વિધિવત ફરિયાદ નોંધાવી છે. પીએસઆઇ એચ.કે. ઝાલાએ જતીન વર્મા તથા કોઝવે નામની ફેક એપ્લિકેશનના મેનેજર રાજલાલ વસાણી તેમજ અન્ય શખ્સો સામે ગુન્હો નોંધી તપાસ શરૂ કરી છે.

જો આપને આ પોસ્ટ ગમી હોય તો શેર કરો...