સોનલનગરમાં મકાનમાં ૮૪ બોટલ દારૂ સાથે ચાર શખ્સની ધરપકડ

Author: નોબત સમાચાર

સોનલનગરમાં મકાનમાં ૮૪ બોટલ દારૂ સાથે ચાર શખ્સની ધરપકડ

અન્ય બે દરોડામાં ૬૧ ચપલા કબજે કરાયાઃ

જામનગર તા. ૨૦: જામનગરના સોનલનગરમાં આવેલા એક મકાનમાંથી પોલીસે દારૂની ૮૪ બોટલ સાથે ચાર શખ્સને પકડી પાડ્યા છે. કાલાવડના રાજસ્થળી ગામના પાટીયા પાસેથી રાજકોટનો શખ્સ ૨૧ ચપલા સાથે અને નિલકમલ સોસાયટીમાં એક શખ્સના મકાનમાંથી પોલીસે ૪૦ ચપલા ઝડપી લીધા છે. દિગ્વિજય પ્લોટમાંથી બોટલ સાથે એક શખ્સ મળી આવ્યો છે.

જામનગરના સોનલનગર વિસ્તારમાં હનુમાન ટેકરી પાસે આવેલા એક મકાનમાં દારૂનો જથ્થો પડ્યો હોવાની બાતમી સિટી સી ડિવિઝનના સર્વેલન્સ સ્ટાફના હોમદેવસિંહ, હર્ષદ પરમારને મળતા પીઆઈ જે.વી. ચૌધરીને વાકેફ કરાયા પછી પીએસઆઈ વી.બી. બરબસીયા તથા સ્ટાફે ગઈકાલે બપોરે ત્યાં આવેલા હરદેવસિંહ મહેન્દ્રસિંહ કંચવા નામના શખ્સના મકાનમાં દરોડો પાડી તલાશી લીધી હતી.

ત્યાંથી ભારતીય બનાવટના અંગ્રેજી શરાબની ૮૪ બોટલ મળી આવી હતી. સ્થળ પરથી હરદેવસિંહ કંચવા, ક્રિપાલસિંહ અજીત સિંહ ચુડાસમા, વિરેન્દ્રસિંહ બટુકસિંહ જાડેજા, શક્તિસિંહ નટુભા જાડેજા ઉર્ફે સુનાનસિંહ નામના ચાર શખ્સની ધરપકડ કરાઈ છે. રૂા.૪ર હજારનો દારૂ ઝબ્બે લેવાયો છે. આ શખ્સોએ લીબડી તાલુકાના બોડીયા ગામના દિવ્યરાજસિંહ નામના શખ્સના મોબાઈલ નંબર પોલીસને આપ્યા છે.

કાલાવડ તાલુકાના રાજસ્થળી ગામના પાટીયા પાસેથી ગઈકાલે બપોરે જઈ રહેલા રાજકોટના ગંજીવાડા વિસ્તારમાં રહેતા સદામ મહેબુબ ઘાંચી નામના શખ્સને રોકાવી પોલીસે ચેક કરતા તેના કબજામાંથી અંગ્રેજી શરાબના ૨૧ ચપલા મળી આવ્યા હતા.

જામનગરના ખોડિયાર કોલોની વિસ્તાર સામે આવેલી નિલકમલ સોસાયટીની શેરી નં.૬માં રિક્ષા ડ્રાઈવર જીગા ઉર્ફે શક્તિસિંહ અજીતસિંહ કંચવાના મકાનમાં ગઈકાલે સવારે પોલીસે દરોડો પાડી તલાશી લીધી હતી. તે મકાન માંથી દારૂના ૪૦ ચપલા મળી આવ્યા હતા. ચપલા કબજે કરી પોલીસે શક્તિસિંહની ધરપકડ કરી છે.

જામનગરના દિગ્વિજય પ્લોટ શેરી નંં.૫૮ના છેવાડેથી ગઈકાલે સાંજે મેહુલ ઉર્ફે મિલન માધવજીભાઈ ચાંદ્રા નામના શખ્સને દારૂની એક બોટલ સાથે પોલીસે પકડી લીધો છે.

જો આપને આ પોસ્ટ ગમી હોય તો શેર કરો...