Author: નોબત સમાચાર
વિજરખી પાસે મોટર સામસામે આવી ગયા પછી નગરના યુવાન પર છ શખ્સનો હુમલો
પટેલ કોલોનીમાં બાઈક-મોટર સામસામે આવી ગયા પછી ઝપાઝપીઃ બંને પક્ષે કરી ફરિયાદઃ
જામનગર તા.૬ : જામનગર-કાલાવડ રોડ પર વિજરખી ગામ પાસે મંગળવારે રાત્રે બે મોટર સામસામી આવી ગયા પછી એક મોટરચાલક પર છ શખ્સે ધોકા, લાકડી, ઢીકાપાટુથી હુમલો કરી માર મારવા ઉપરાંત મોટરનો કાચ ફોડી નાખ્યો હતો. જ્યારે પટેલ કોલોનીમાં એક મોટરચાલકે સામેથી આવતા બાઈકચાલકે ઝપાઝપી કરી ગાળો ભાંડ્યાની અને એક યુવતીએ મોટરચાલક સામે ગાળો આપી ઝપાઝપી કર્યાની અને ધમકી આપ્યાની રાવ કરી છે.
જામનગરના ગાંધીનગર રેલવે સ્ટેશન પાસે વસવાટ કરતા અને બાંધકામનો વ્યવસાય કરતા પરાક્રમસિંહ બહાદુરસિંહ જાડેજા મંગળવારે રાત્રે સાડા દસેક વાગ્યે વિજરખી ગામ પાસેથી પોતાના મિત્ર જીતેન્દ્રભાઈ સાથે જીજે-૧૮-બીઆર ૩૪ નંબરની કીયા મોટરમાં જતા હતા ત્યારે સામે જીજે-૬-એફક્યુ ૪૨૨૨ નંબર વાળી સ્વીફટ મોટર આવી હતી તે મોટરના ચાલક સાથે ગાડી લેવા બાબતે બોલાચાલી થતાં સ્વીફટ મોટરમાંથી એક શખ્સ ધોકો લઈને ઉતર્યાે હતો.
તેણે પરાક્રમસિંહ પાસે આવી ગોઠણ તથા હાથમાં ધોકો ફટકારતા પરાક્રમસિંહ પડી ગયા હતા. તેમના પર શૈલેષ ધનાભાઈ લોખીલ અને દિનેશ બિજલભાઈ લોખીલ નામના બે શખ્સ લાકડીથી તૂટી પડ્યા હતા. આ શખ્સોએ પરાક્રમસિંહને ઢસડ્યા પછી હેમત વસરામભાઈ લોખીલ, અશ્વિન ધનાભાઈ લોખીલ, મનુ મેરાભાઈ લોખીલ, દિનેશ ખેંગારભાઈ લોખીલ નામના ચાર શખ્સ ધસી આવ્યા હતા. તેઓએ ઢીકાપાટુથી માર મારવાનું શરૂ કર્યું હતું તેનાથી બચવા માટે પરાક્રમસિંહ પોતાની મોટર મૂકી દોડી ગયા હતા. પાછળથી આ શખ્સોએ તેઓની મોટરનો કાચ ધોકો મારીને તોડી નાખ્યો હતો. નાકમાં ફ્રેક્ચર સહિતની ઈજા પામેલા પરાક્રમસિંહને દવાખાને ખસેડવામાં આવ્યા છે. જ્યાંથી તેઓએ ગઈકાલે સાંજે પોલીસ ફરિયાદ નોંધાવી છે.
જામનગરના પટેલકોલોની વિસ્તારની શેરી નં.૭/૧માં રહેતા મનદીપસિંહ નરેન્દ્રસિંહ ચુડાસમા ગઈકાલે બપોરે પટેલ કોલોની-૭ નંબરમાંથી પોતાની ઓફિસ તરફ જતા હતા ત્યારે સામેથી બાઈક પર આવેલા એક અજાણ્યા શખ્સે તારા બાપનો રોડ છે તેમ પૂછી ગાળો ભાંડી હતી અને ઝપાઝપી કરી હતી. તે પછી જાનથી મારી નાખવાની ધમકી આપી આ શખ્સ નાસી ગયો હતો. સિટી બી ડિવિઝન પોલીસ સ્ટેશનમાં તેની ફરિયાદ નોંધાવાઈ છે.
જામનગરના સાધના કોલોની વિસ્તારમાં રહેતા પૂજાબેન કાનાભાઈ કારીયા ઉર્ફે પુરીબેન ગઢવી ગઈકાલે બપોરે પોતાના મિત્ર જય સાથે પટેલ કોલોની વિસ્તારની શેરી નં.૭ માંથી બાઈક પર જતા હતા ત્યારે એક અજાણી મોટર સામે આવી હતી. તેના ચાલકને પૂજાબેને ગાડી જોઈને ચલાવવા કહેતા ઉશ્કેરાયેલા મોટરચાલકે જયને ગાળો ભાંડી ઝપાઝપી કરવા ઉપરાંત જાનથી મારી નાખવાની ધમકી આપ્યાની સિટી બી ડિવિઝનમાં ફરિયાદ કરવામાં આવી છે.
જો આપને આ પોસ્ટ ગમી હોય તો શેર કરો...
Follow us: આ જ પ્રકારની બીજી પોસ્ટ માટે અમારી એપ ડાઉનલોડ કરો.
Android: https://rb.gy/surhtv
Apple ios: https://rb.gy/cee4r9
Social Media
ફોટો સ્ટોરી માટે અમારા ઇન્સ્ટાગ્રામ પેઈજને ફોલ્લો કરો
https://www.instagram.com/nobatdaily?r=nametag
વિડિયો માટે અમારી યુ-ટ્યૂબ ચેનલને સબસ્ક્રાઈબ કરો
https://youtube.com/@Nobatofficial
અન્ય સમાચારો
