હાલારની ૬ માંથી પ નગરપાલિકાના પ્રમુખ તેમજ ઉપપ્રમુખ નિમાયાઃ હવે મોટો પડકાર...

Author: નોબત સમાચાર

હાલારની ૬ માંથી પ નગરપાલિકાના પ્રમુખ તેમજ ઉપપ્રમુખ નિમાયાઃ હવે મોટો પડકાર...

ચૂંટણીમાં કરેલા વાયદાઓ પૂરા કરવા પડશેઃ

જામનગર તા. ૬: હાલારની ૬ નગર પાલિકાઓની ચૂંટણી પછી પાંચ નગરપાલિકામાં ભાજપ અને સલાયાની નગર પાલિકામાં કોંગ્રેસને બહુમતી મળી હતી. ધ્રોળ સિવાયની પાંચ નગરપાલિકાઓના પ્રમુખ અને ઉપપ્રમુખો તથા કારોબારી અધ્યક્ષ જેવા હોદ્દાઓ પર ચૂંટણીઓ (નિમણૂકો) થઈ ગયા પછી હવે આ પાંચેય નગરપાલિકાઓના નવા હોદ્દેદારો સામે મોટો પડકાર તેઓએ જ ચૂંટણી દરમિયાન વાયદાઓની કરેલી લ્હાણીને અનુરૂપ કામ કરવાનો રહેવાનો છે, અને સલાયામાં 'બેકડોર' એક્ટિવિટી સફળ ન થઈ અને કોંગ્રેસે સરળતાથી સત્તા હાંસલ કર્યા પછી પણ ગમે ત્યારે 'સખળડખળ' થવાની શક્યતા નકારી શકાય તેમ નથી.

સલાયામાં સ્થાનિક સમસ્યાઓની તો વણઝાર છે અને લોકોની અપેક્ષાઓ પણ ઘણી જ વધુ છે, તેવી જ રીતે ભાણવડમાં પુનઃ સત્તા પ્રાપ્તિ માટે ભાજપે મોટા મોટા વાયદાઓ કર્યા છે, તેને અનુરૂપ સક્રિયતા દેખાડવી જ પડશે, અને કેટલાક વાયદાઓ ચેલેન્જ જેવા જ છે.

સૌથી વધુ પડકાર યાત્રાધામ દ્વારકામાં રહેવાનો છે, કારણ કે દ્વારકાની નગરપાલિકા પર સ્થાનિક વસતિ ઉપરાંત બારેય માસ યાત્રિકોની રહેતી ફ્લોટીંગ પોપ્યુલેશનની મૂળભૂત સુખ-સુવિધાઓ સંતષવાનો કાયમી પડકાર રહેતો હોય છે, અને હવે દ્વારકા કોરીડોરના તથા દબાણ હટાવ ઝુંબેશોના સંદર્ભે પણ સ્થાનિક નારાજગી, અસંતોષ કે અસુવિધાનો પડકાર રહેશે, અને લોકોને સમજાવીને તથા સૌને સાથે રાખીને જ આ પડકાર ઝીલી શકાશે.

જામજોધપુરમાં તો કેટલીક લાંબાગાળાની સમસ્યાઓ જેમની તેમ જ છે, તે ઉપરાંત આ વખતે ચૂંટણી સમયે મતદારો સમક્ષ કેટલાક નવા વાયદાઓ પણ કરાયા છે, જે પૂરા તો કરવા જ પડશે ને?

ધ્રોળમાં એક બેઠકની ચૂંટણી થયા પછી હોદ્દેદારો નક્કી થશે, પરંતુ ધ્રોળમાં પણ જુની ઘણી સમસ્યાઓ ઉકેલ માંગે છે.

હાલ તુરંત તો પાંચે ય નગરપાલિકાઓના નવા હોદ્દેદારોને શુભેચ્છાઓ પાઠવીએ અને પ્રજા (નગરજનો તથા યાત્રિકો) ની અપેક્ષાઓ સંતોષવા ઉપરાંત 'આઉટ ઓફ બોક્સ' જઈને કેટલાક નવા વિકાસ તથા લોકકલ્યાણના કાર્યો પણ થાય તેવું ઈચ્છીએ.

જો આપને આ પોસ્ટ ગમી હોય તો શેર કરો...