જામનગર-જામજોધપુરના નરમાણા ગામના બે યુવાને છૂટાછેડા પછી કરી આત્મહત્યા

Author: નોબત સમાચાર

જામનગર-જામજોધપુરના નરમાણા ગામના બે યુવાને છૂટાછેડા પછી કરી આત્મહત્યા

પેટના દુખાવાથી કંટાળી ઈશ્વરીયા ગામની વિદ્યાર્થિનીનું વિષપાનઃ સારવારમાં મૃત્યુઃ

જામનગર તા.૬ : જામનગરના ગુલાબનગર વિસ્તારમાં રહેતા એક સતવારા યુવાનના દોઢેક મહિના પહેલાં છૂટાછેડા થયા પછી આ યુવાને ગઈકાલે ગળાફાંસો ખાઈ જિંદગીનો અંત આણ્યો છે. જ્યારે જામજોધપુરના નરમાણા ગામના યુવાને છૂટાછેડા થયા પછી વિચારવાયુ થતાં અને એકલતા અનુભવતા ગળાટૂંપો ખાઈ જિંદગી ટૂંકાવી લીધી છે. લાલપુરના ઈશ્વરીયા ગામના એક વિદ્યાર્થિનીએ પેટમાં થતાં દુખાવાથી કંટાળી જઈને ઝેરી દવા પી મોત મીઠું કરી લીધુ છે.

જામનગરના ગુલાબનગર રોડ પર શાક માર્કેટ નજીક વસવાટ કરતા ચેતનભાઈ રમેશભાઈ કણઝારીયા નામના બત્રીસ વર્ષના સતવારા યુવાને ગઈકાલે સાંજે પોતાના ઉપરના માળે જઈ પંખામાં દુપટ્ટો બાંધી ગળાફાંસો ખાઈ લીધો હતો.

આ બાબતની તેમના પરિવારને જાણ થતાં ૧૦૮ને કોલ કરવામાં આવ્યો હતો. દોડી આવેલી એમ્બ્યુલન્સના સ્ટાફે ચેતનભાઈને ચકાસ્યા પછી મૃત્યુ પામેલા જાહેર કર્યા હતા. મૃતકના નાનાભાઈ ધર્મેશ કણઝારીયાએ પોલીસને જાણ કરી છે. તેઓએ પોલીસ સમક્ષ જણાવ્યા મુજબ દોઢેક મહિના પહેલાં ચેતનભાઈના છૂટાછેડા થયા હતા. તે પછી કંટાળી ગયેલા તેમના મોટાભાઈએ આત્મહત્યા કરી લીધી છે.

લાલપુર તાલુકાના ઈશ્વરીયા ગામમાં રહેતા અને અભ્યાસ કરતા ભાર્ગવીબેન મહેશભાઈ સાવલીયા નામના વીસ વર્ષના યુવતીને છેલ્લા બે મહિનાથી પેટમાં સતત દુખાવો રહેતો હતો. સારવાર લેવા છતાં સારૂ થતું ન હોવાથી કંટાળી ગયેલા ભાર્ગવીબેને ગઈ તા.૮ની સવારે ઈશ્વરીયા ગામ નજીક રોડ પર કોઈ ઝેરી દવા ગટગટાવી લીધી હતી. સારવાર માટે જામનગરની જીજી હોસ્પિટલમાં દાખલ કરવામાં આવેલા આ યુવતીનું ગઈકાલે મૃત્યુ નિપજ્યું છે. પિતા મહેશભાઈ દામજીભાઈ સાવલીયાએ પોલીસને જાણ કરી છે.

જામજોધપુર તાલુકાના નરમાણા ગામના સંજયભાઈ રાજેશભાઈ વાલ્વા (ઉ.વ.૩૧) નામના યુવાનના લગ્ન થયા પછી આ દંપતી વચ્ચે વિખવાદ થતાં તેઓએ છૂટાછેડા મેળવ્યા હતા. તે પછી ગુમસુમ રહેતા અને એકલતા અનુભવતા સંજયભાઈએ મંગળવારની રાત્રિથી બુધવારની સવાર સુધી માં ઘરમાં રહેલા પાઈપમાં દોરી બાંધી ગળાટૂંપો ખાઈ લીધો હતો. જેની ગઈકાલે સવારે જાણ થતાં તેમના મોટાભાઈ હરેશભાઈ વાલ્વાએ પોલીસને વાકેફ કરી છે. શેઠવડાળા પોલીસે તપાસ હાથ ધરી છે.

જો આપને આ પોસ્ટ ગમી હોય તો શેર કરો...