પીએમ મોદી પાંચમી મેના અયોધ્યામાં રોકાશે પછી કરશે રામલલ્લાના દર્શન

Author: નોબત સમાચાર

પીએમ મોદી પાંચમી મેના અયોધ્યામાં રોકાશે પછી કરશે રામલલ્લાના દર્શન

૭મી મેના અમદાવાદમાં મતદાનઃ ૧૩મી મેના વારાણસીમાં નામાંકન

નવી દિલ્હી તા.૦૩: લોકશાહીના પર્વનો ત્રીજો તબક્કો એટલે કે ૭મી મેના લોકસભાની ચૂંટણીના ત્રીજા તબક્કાનું મતદાન છે. ગુજરાતમાં પણ આ દિવસે મતદાન થવાનું છે. ત્યારે પીએમ મોદી વોટ આપવા અમદાવાદ આવશે. જોકે તેઓ વારાણસીથી બીજેપીના ઉમેદવાર છે. તેઓ ૧૨ કે ૧૩ મેના ઉમેદવારી ફોર્મ ભરવા જઈ શકે છે. પરંતુ તે પહેલા તેઓ રામલલ્લાના આશીર્વાદ લેવા જવાના છે.

ત્રીજા તબક્કાના મતદાન પહેલા એટલે કે ૫ મેના પીએમ મોદી અયોધ્યા જશે અને રામલલ્લાની પૂજા કરશે. પીએમ મોદી સાંજે લગભગ ૭ વાગ્યે રામલલ્લાના દર્શન કરશે અને ત્યારબાદ તેઓ અયોધ્યામાં રોડશો પણ કરશે.

પીએમ મોદી શનિવારે કાનપુરમાં હશે. જ્યારે તેઓ રવિવારે અયોધ્યા જશે. પીએમ મોદી ૭ વાગ્યે અયોધ્યામાં રામ મંદિર જશે અને ૭-૧૫ વાગ્યે અયોધ્યામાં રોડ શો કરશે. જો કે, બન્ને શહેરોમાં તેમનો રોડ શો યોજાશે તેવી માહિતી સામે આવી છે.

મળતી માહિતી મુજબ પીએમ મોદી અયોધ્યામાં લગભગ ૨ કિલોમીટર લાંબો રોડ શો કરશે. પીએમ મોદીના આગમનને લઈને અયોધ્યાના રહેવાસીઓ સંપૂર્ણ રીતે તૈયાર છે. પીએમ મોદીની અયોધ્યા મુલાકાતને ઐતિહાસિક બનાવવા માટે ભાજપ જોર-શોરથી તૈયારીઓમાં વ્યસ્ત છે. ચૂંટણી વચ્ચે પીએમ મોદી પહેલી વાર અયોધ્યા જઈ રહ્યા છે. આ પહેલા પણ તેઓ અનેક પ્રસંગોએ અયોધ્યામાં રામલલ્લાના દર્શન કરી ચૂક્યા છે.

છેલ્લા ચાર મહિનામાં અયોધ્યામાં પીએમ મોદીનો આ બીજો રોડ શો હશે. આ પહેલા તેમણે મહર્ષિ વાલ્મિકી ઈન્ટરનેશનલ એરપોર્ટના ઉદ્ઘાટન સમયે ભવ્ય રોડ શો કર્યો હતો. આ દરમ્યાન તેમની એક ઝલક મેળવવા માટે મોટી ભીડ ઉમટી પડી હતી. ફરી એકવાર અયોધ્યા પીએમ મોદીનું સ્વાગત કરવા તૈયાર છે.

જો આપને આ પોસ્ટ ગમી હોય તો શેર કરો...