ધોરીવાવ પાસે અકસ્માત સર્જનાર મોટરચાલકે હુમલો થયાની કરી રાવ

Author: નોબત સમાચાર

ધોરીવાવ પાસે અકસ્માત સર્જનાર મોટરચાલકે હુમલો થયાની કરી રાવ

ધુનડામાં વૃદ્ધ પર પિતા-પુત્રએ કર્યાે હુમલોઃ

જામનગર તા. ૨૯: જામજોધપુરના ધુનડામાં વિપ્ર વૃદ્ધ પર પિતા-પુત્રએ હુમલો કરી માર માર્યાની ફરિયાદ કરાઈ છે. જ્યારે ગુરૂવારે રાત્રે ધોરીવાવ પાસે મોટર તથા રિક્ષા વચ્ચે અકસ્માત થયા પછી મોટરચાલક પર ત્રણ અજાણ્યા શખ્સે હુમલો કર્યાની અને કોઈએ મોટર સળગાવ્યાની પોલીસમાં ફરિયાદ કરવામાં આવી છે.

જામજોધપુર તાલુકાના ધુનડા ગામમાં રહેતા ગૌરીશંકર ગીગાભાઈ શીલુ (ઉ.વ.૬૭) નામના વિપ્ર વૃદ્ધ ગઈકાલે સાંજે પોતાના ઘર પાસે હતા ત્યારે તેઓને કોઈ કારણ વગર ભીખુભાઈ રતીલાલ શીલુ અને મુકેશ રતીલાલ શીલુએ ગાળો ભાંડી હુમલો કર્યાે હતો. ત્યાં પડેલો પથ્થર ઉપાડી ભીખુભાઈ શીલુએ ઘા કરતા ઈજા પામેલા ગૌરીશંકરભાઈને સારવારમાં ખસેડાયા છે. તેઓની ફરિયાદ પરથી પોલીસે ગુન્હો નોંધ્યો છે.

જામનગરના રણજીત સાગર રોડ પર ધોરીવાવ નજીક ગુરૂવારે રાત્રે જીજે-૧૦-ડીએન ૩૭૧૬ નંબરની મોટર સામેથી આવતી સીએનજી રિક્ષા સાથે ટકરાઈ પડી હતી. આ અકસ્માતમાં રિક્ષામાં રહેલા ત્રણ મુસાફર અને તેના ચાલકને ગંભીર ઈજા થઈ હતી. ઈજાગ્રસ્તોને સારવાર માટે જામનગરની જી.જી. હોસ્પિટલમાં ખસેડાયા પછી ત્રણ ઈજાગ્રસ્તને વધુ સારવાર માટે હાયર સેન્ટર લઈ જવાયા છે. તે પછી મોટરના ચાલક પટેલ કોલોની શેરી નં.૬માં રહેતા જીત શૈલેષભાઈ ભોજાણીએ પોતાના પર હુમલો થયાની અને કોઈએ મોટર સળગાવ્યાની પોલીસમાં ફરિયાદ નોંધાવી છે.

ઉલ્લેખનીય છે કે, અકસ્માત પછી રિક્ષાના ચાર ઈજાગ્રસ્ત અને મોટરમાં રહેલા તેના ચાલક જીત અને અન્ય વ્યક્તિને સારવાર માટે જી.જી. હોસ્પિટલમાં લાવવામાં આવ્યા હતા. જ્યાં વાતાવરણ થોડુ તંગ બન્યું હતું. સિટી બી ડિવિઝનના પીઆઈ પી.પી. ઝા સહિતનો પોલીસ કાફલો દોડી ગયો હતો. તે પછી જીત ભોજાણીએ ગઈકાલે બપોરે ફરિયાદ નોંધાવી છે. જેમાં તેણે જણાવ્યા મુજબ અકસ્માતનો ખાર રાખી ત્રણ શખ્સે ગાળો ભાંડી ધોકા, ઢીકાપાટુ, પથ્થરથી હુમલો કર્યાે હતો અને પછી કોઈએ મોટર સળગાવી દીધી હતી.

જો આપને આ પોસ્ટ ગમી હોય તો શેર કરો...