પ્રેમી સાથે નાસી ગયેલી પુત્રીએ માતા પિતાને બેભાન કરી ઘરમાંથી ઉઠાવ્યા સાડા ત્રણ લાખ

Author: નોબત સમાચાર

પ્રેમી સાથે નાસી ગયેલી પુત્રીએ માતા પિતાને બેભાન કરી ઘરમાંથી ઉઠાવ્યા સાડા ત્રણ લાખ

પુત્રી અને અન્ય બે સામે પિતાએ નોંધાવી ફરિયાદઃ

જામનગર તા. ૨૯: જામનગર નજીકના મોટી ખાવડીમાં પાણીપૂરી વેચવાનો ધંધો કરતા એક પરપ્રાંતિય પ્રૌઢની પુત્રીને પ્રેમજાળમાં ફસાવ્યા પછી એક શખ્સે પોતાના સાગરિત સાથે મળી તે યુવતીને નાસી જવા માટે પ્રેરી હતી. તેના પગલે આ યુવતીએ પોતાના માતા-પિતાને ઘેનની દવાવાળું ઠંડુપીણુ પીવડાવી ઘરમાંથી રૂપિયા સાડા ત્રણ લાખ રોકડા ઉઠાવી લીધા હતા. પિતાએ ત્રણેય સામે ફરિયાદ નોંધાવી છે.

જામનગર-ખંભાળિયા માર્ગ પર આવેલા મોટી ખાવડી ગામમાં ભાડાના મકાનમાં રહેતા અને પાણીપૂરીનો વ્યવસાય કરતા મૂળ ઉત્તરપ્રદેશના જાલોન જિલ્લાના ગોપાલપુરા ગામના છોટેભાઈ ગ્યાદીન કુશવાહ ઉર્ફે મૂળુભાઈ નામના પ્રૌઢે પોતાની પુત્રી ખૂશ્બુ તથા પોતાના જ વતનના અંભુજ ઉર્ફે બિટુ પ્રદીપભાઈ ગુપ્તા તથા કપ્તાન ઠાકુરદાસ સામે મેઘપર પોલીસ સ્ટેશનમાં ફરિયાદ નોંધાવી છે.

ફરિયાદમાં જણાવવામાં આવ્યા મુજબ છોટેભાઈની પુત્રી ખૂશ્બુ સાથે ઉપરોક્ત શખ્સે પ્રેમ સંબંધ રચ્યો હતો. તે પછી ખૂશ્બુને પોતાની સાથે નાસી જવા માટે અંભુજ તથા કપ્તાને ઉશ્કેર્યા પછી આ યુવતી તેના કહેવામાં આવી ગઈ હતી.

ત્રણેય વ્યક્તિએ કાવતરૂ રચ્યા પછી ખૂશ્બુએ પોતાના પિતા છોટેભાઈ તથા માતાને ઉંઘ આવી જાય તેવી ગોળીનો પાવડર બનાવી ઠંડાપીણામાં ભેળવી પીવડાવી દીધો હતો. દવાના ઘેનના કારણે છોટેભાઈ તથા તેમના પત્ની સૂઈ ગયા હતા અને પાછળથી ખૂશ્બુ તેમજ અંભૂજ અને કપ્તાન ઘરમાં રાખવામાં આવેલી લોખંડની પેટીમાંથી રૂપિયા સાડા ત્રણ લાખ રોકડા ઉપાડીને રફૂચક્કર થઈ ગયા હતા. પોલીસે ઉપરોક્ત ફરિયાદ પરથી ખૂશ્બુ, અંભુજ તથા કપ્તાન સામે આઈપીસી ૧૨૦ (બી), ૩૨૮, ૩૮૦, ૧૧૪ હેઠળ ગુન્હો નોંધ્યો છે.

જો આપને આ પોસ્ટ ગમી હોય તો શેર કરો...