જામનગરમાં ટાઉનહોલથી સાત રસ્તા સુધીનો માર્ગ વાહનવ્યવહાર માટે બંધ

Author: નોબત સમાચાર

જામનગરમાં ટાઉનહોલથી સાત રસ્તા સુધીનો માર્ગ વાહનવ્યવહાર માટે બંધ

આવતીકાલે બ૫ોરે ૧૨ વાગ્યાથી રાત્રે ૯ સુધી વડાપ્રધાનના કાર્યક્રમ સંદર્ભે

જામનગર તા. ૧: ભારતના વડાપ્રધાન નરેન્દ્રભાઈ મોદી આવતીકાલ તા. ર-પ-ર૦ર૪ ના જામનગર આવી રહ્યાં છે. આથી કેટલાક માર્ગો વાહન વ્યવહાર માટે બંધ કરવામાં આવ્યા છે. જો કે, તે માટે વૈકલ્પિક વ્યવસ્થા કરવામાં આવી છે.

જામનગરના અધિક જિલ્લા મેજિસ્ટ્રેટ ભાવેશ ખેર દ્વારા વાહન વ્યવહાર પર નિયંત્રણ રાખવા જાહેર નામું પ્રસિદ્ધ કર્યુ છે. જે તા. ર-પ-ર૦ર૪ ના બપોરે ૧ર થી રાત્રે ૯ વાગ્યા સુધી અમલમાં રહેશે.

જેમાં ટાઉનહોલથી સાતરસ્તા સુધીનો માર્ગ બંધ રહેશે. તથા વૈકલ્પિક રૂટ તરીકે સાતરસ્તા સર્કલથી એસ.ટી. બસ સ્ટેન્ડ રોડ તરફ અને ટાઉનહોલથી ત્રણબત્તી, અંબર સર્કલ તરફના માર્ગનો ઉપયોગ કરવાનો રહેશે. ગુરૂદ્વારાથી તુલસી હોટલ, લાલબંગલા સર્કલ સુધી, વિનુમાંકડના સ્ટેચ્યુથી તુલસી હોટલ સુધી અને તુલસી હોટલથી લીમડાલેન, ત્રણબત્તી સુધીનો માર્ગ બંધ રહેશે. તેના બદલે ગુરૂદ્વારાથી અંબર ચોકડી, ઝુલેલાલ મંદિર, ત્રણબત્તી થઈ બેડીગેઈટ તરફનો માર્ગ ખૂલ્લો રહેશે.

ચેતક ટ્રાવેલ્સ (મીગ કોલોની) થી પત્રકાર કોલોનીવાળો માર્ગ બંધ રહેશે, તેના બદલે તળાવના પાછળના રોડ પર થઈ જયમાતાજી હોટલવાળા માર્ગનો ઉપયોગ કરવાનો રહેશે.

સમર્પણ સર્કલથી દિગ્જામ સર્કલ, સંતોષી માતાજી મંદિર, સાતરસ્તા સુધીનો માર્ગ બંધ રહેશે. તેના વૈકલ્પિક રૂટ તરીકે સમર્પણ સર્કલ તરફથી આવતા વાહનો માટે ખંભાલીયા બાયપાસથી લાલપુર બાયપાસ, સાધના કોલોની, પવનચક્કી તથા ખંભાલીયા બાયપાસ, લાલપુર બાયપાસ ઠેબા ચોકડી - ખીજડીયા બાયપાસ થઈ ગુલાબનગર તરફ જઈ શકાશે. પંચવટી સર્કલથી સંતોષી માતાજીના મંદિર તરફ આવતા વાહનો સત્યમ કોલોનીથી સત્યસાઈ સ્કૂલ, જોગસપાર્ક થઈ ડીકેવી સર્કલ તરફ જઈ શકાશે.

જ્યારે સમર્પણ સર્કલથી મહાકાળી એરફોર્સ ગેઈટ સુધીનો માર્ગ બંધ રખાશે તેના બદલે સભા સ્થળ પર આવતા તમામ પ્રકારના વાહનો માટે ખંભાલીયા બાયપાસથી લાલપુર બાયપાસ, સાધના કોલોની, પવનચક્કીથી એસ.ટી.નો ડ્રોપ પોઈન્ટ સુધી, ખીજડીયા બાયપાસથી ઠેબા ચોકડી, લાલપુર બાયપાસ, સાધના કોલોની, પવનચક્કી સર્કલથી એસ.ટી. ડેપો ડ્રોપ પોઈન્ટ સુધીનો માર્ગ ખૂલ્લો રહેશે.

ઈમરજન્સી સેવાના વાહનો, જેમ કે, એમ્બ્યુલન્સ, ફાયર, ફરજમાં હોય તે અધિકારીઓને આદેશમાંથી મુક્તિ આપવામાં આવી છે.

આ જાહેરનામાનું ઉલ્લંઘન કરનાર સામે નિયમભંગ બદલ પગલા લેવામાં આવશે.

જો આપને આ પોસ્ટ ગમી હોય તો શેર કરો...