રાંદલનગરમાં યુવતી તથા તેના માતાને બોલાવી દંપતીએ હુમલો કર્યાની રાવ

Author: નોબત સમાચાર

રાંદલનગરમાં યુવતી તથા તેના માતાને બોલાવી દંપતીએ હુમલો કર્યાની રાવ

શાપરમાં ડમ્પર ડ્રાઈવરને પાઈપથી ફટકારાયોઃ

જામનગર તા. ૧૩: જામનગરના રાંદલનગરમાં એક યુવાને ત્રણેક મહિના પહેલાં ગળાફાંસો ખાઈ લીધો હતો. આ યુવાનના માતા-પિતાએ તેની સાથે અગાઉ વાત કરતી એક યુવતી તથા તેના માતાને ઘેર બોલાવી પૂછ્યા પછી યુવતીના માથામાં ફૂલદાની ઝીંકી હતી. જ્યારે શાપર ગામમાં એક ડમ્પર ડ્રાઈવર પર બે શખ્સે પાઈપથી હુમલો કરી ડમ્પરમાં નુકસાન સર્જી ગાળો ભાંડી હતી.

જામનગરના રાંદલનગરમાં શેરી નં.૬માં રહેતા ઉમેદાબેન મુઝફ્ફર સફીયા તથા તેમની પુત્રી મુસ્કાનને ગઈકાલે બપોરે ત્યાં જ રહેતા અશોકબા ભૂપતસિંહ જાડેજા નામના મહિલાએ ફોન કરી પોતાના ઘરે આવવા માટે કહ્યું હતું તેથી ઉમેદાબેન અને મુસ્કાન ત્યાં ગયા હતા.

આ વેળાએ અશોકબાએ પોતાના પુત્ર રાજદીપસિંહે ત્રણેક મહિના પહેલા ગળાફાંસો ખાઈ આત્મહત્યા કરી હતી. તે બાબતે પૂછ્યું હતું. અગાઉ મુસ્કાન તથા રાજદીપ ફોન પર વાત કરતા હતા. તે પછી રાજદીપે ગળાફાંસો કેમ ખાધો તેમ ગઈકાલે અશોકબાએ પૂછ્યા પછી મુસ્કાને ખબર નથી તેમ કહેતા અશોકબા તથા તેમના પતિ ભૂપતસિંહ જાડેજા ઉશ્કેરાયા હતા.

આ દંપતીએ ગાળો ભાંડી હતી અને અશોકબાએ ફૂલદાની ઉપાડી મુસ્કાનના માથા પર ફટકારી હતી અને ભૂપતસિંહે તલવાર કાઢી ધમકી આપી ગાળો ભાંડી હતી. માથામાં ઈજા પામેલી મુસ્કાનને ટાંકા લેવા પડ્યા છેે. ઉમેદાબેને સિટી બી ડિવિઝનમાં ફરિયાદ નોંધાવી છે.

જામનગર તાલુકાના સિક્કાની પંચવટી સોસાયટીમાં રહેતા રસુલ અજીઝ બાલાગામીયાને મુંગણી ગામના બલરાજસિંહ, પ્રેમદીપસિંહ બ્રિજરાજસિંહે ગઈકાલે શાપર ગામમાં ગાળો ભાંડી પાઈપથી હુમલો કર્યાે હતો અને ડમ્પરમાં નુકસાન કરી ફોન પર ગાળો પણ ભાંડી હતી.

જો આપને આ પોસ્ટ ગમી હોય તો શેર કરો...