મધ્યપ્રદેશના રેવા જિલ્લામાંથી ગુમ થયેલા પોલીસ ડ્રાઈવર જબલપુરથી મળી આવ્યા

Author: નોબત સમાચાર

મધ્યપ્રદેશના રેવા જિલ્લામાંથી ગુમ થયેલા પોલીસ ડ્રાઈવર જબલપુરથી મળી આવ્યા

તેઓને સાથે રાખી એલસીબીની ટૂકડી સાંજ સુધીમાં આવશેઃ

જામનગર તા.૭ : જામનગરની જેલમાં રહેલા એક કેદીને ઉત્તરપ્રદેશની સોનગઢ કોર્ટમાં હાજર કરવા માટે સાથે રાખીને રવાના થયેલી જામનગર પોલીસની એક ટૂકડીના પોલીસ જીપના ચાલક મધ્યપ્રદેશના રેવા જિલ્લામાંથી ગુમ થઈ ગયા હતા. તેની શોધ માટે મધ્યપ્રદેશ પહોંચેલી એલસીબી ટીમે આ જવાનને જબલપુરમાંથી શોધી કાઢ્યા છે. તેઓને જામનગર લાવવામાં આવી રહ્યા છે.

જામનગરના સિટી એ ડિવિઝન પોલીસ સ્ટેશનની એક ટીમ થોડા દિવસ પહેલાં જામનગરની જિલ્લા જેલમાં રહેલા એક આરોપીને ઉત્તર પ્રદેશ સ્થિત સોનગઢ કોર્ટમાં તારીખે હાજર કરવા માટે લઈઙ્મો નીકળી હતી. ત્યાંથી અદાલતી મુદ્દતનું કામ પૂર્ણ કરી આ ટીમ મધ્યપ્રદેશ થઈને પરત આવી રહી હતી. ત્યારે રેવા જિલ્લાના એક પેટ્રોલપંપ નજીક રાત્રિ વિરામ લેવાયો હતો.

તે દરમિયાન જામનગરના પોલીસતંત્રમાં મોટર ટ્રાન્સપોર્ટ વિભાગના કર્મચારી કિશોરસિંહ ગોહિલ નામના પોલીસકર્મી ભેદી રીતે લાપત્તા બની ગયા હતા. આ પોલીસ કર્મચારી પોતાનો મોબાઈલ સાથે લેતા ગયા હતા. જ્યારે તેમનું પાકીટ પોલીસ વાનમાંથી સાંપડ્યું હતું. સાથે રહેલા અન્ય પોલીસ કર્મચારીઓએ તે બાબતની જામનગર સ્થિત પોલીસ અધિકારીઓને જાણ કર્યા પછી કિશોરસિંહ ગોહિલની શોધ કરાતી હતી.

આ પોલીસ કર્મચારીને શોધી કાઢવા જામનગરથી લોકલ ક્રાઈમ બ્રાંચની એક ટીમ ધસી ગઈ હતી. તે પછી આ કર્મચારી જબલપુરમાંથી હેમખેમ મળી આવ્યા છે. તેઓને સાથે રાખી એલસીબી ટૂકડી જામનગર પરત ફરી રહી છે. તેઓ કઈ રીતે અને ક્યા કારણથી રેવા જિલ્લામાંથી ગુમ થયા હતા? તેની જામનગર પરત આવ્યે વિગતો ખૂલશે.

જો આપને આ પોસ્ટ ગમી હોય તો શેર કરો...