ગુલાબનગર પાસે ગઈરાત્રે યુવાનને ચાર શખ્સે માર મારી પગ ભાંગી નાખ્યો

Author: નોબત સમાચાર

ગુલાબનગર પાસે ગઈરાત્રે યુવાનને ચાર શખ્સે માર મારી પગ ભાંગી નાખ્યો

મહિલાને ફોન-મેસેજ કરવાનો મામલો ઉગ્ર બન્યોઃ

જામનગર તા.૬ : જામનગરના એક યુવાનના પત્નીને અન્ય શખ્સ ફોન-મેસેજ કરતો હોવાથી તેણે પોતાના સસરાને વાત કરી હતી. તેથી ઉશ્કેરાયેલા ચાર શખ્સે ગઈરાત્રે આ યુવાનને ધોકા-પાઈપથી માર મારી પગ ભાંગી નાખ્યો હતો. પોલીસે ગુન્હો નોંધી તપાસ હાથ ધરી છે.

જામનગરના મોહનનગરથી આગળ આવેલા પ્રતાપનગરમાં રહેતા સુલ્તાન ઈશાકભાઈ હાલાણી ગઈરાત્રે ગુલાબનગર નજીક એક હોટલ પાસે હતા ત્યારે ત્યાં ધસી આવેલા રાજ પાર્કવાળા ફૈઝલ ખેરાણી, કાસમ ખેરાણી, મોહસીન ખેરાણી, અકરમ ખેરાણી નામના ચાર શખ્સે ઝઘડો શરૂ કર્યાે હતો.

ઉપરોક્ત શખ્સો પૈકી ફૈઝલે અગાઉ સુલ્તાનના પત્નીને મેસેજ અને ફોન કર્યા હતા. તે બાબત સુલ્તાને પોતાના સસરાને કહ્યા પછી ગઈકાલે રાત્રે કાસમે તું મારા ભાઈને બદનામ કેમ કરશ તેમ કહી ગાળો ભાંડ્યા પછી ચારેય શખ્સે ધોકા-પાઈપથી હુમલો કરી આડેધડ ફટકા માર્યા હતા. જેમાં સુલ્તાનને પગમાં ફ્રેક્ચર થઈ ગયું હતું. જાનથી મારી નાખવાની ધમકી આપી ચારેય શખ્સ ફરાર થઈ ગયા હતા. આજે વહેલી સવારે સિટી બી ડિવિઝન પોલીસ સ્ટેશનમાં સુલ્તાન હાલાણીએ ફરિયાદ નોંધાવી છે. પોલીસે ગુન્હો નોંધી આરોપીઓના સગડ દબાવ્યા છે.

જો આપને આ પોસ્ટ ગમી હોય તો શેર કરો...