રાજયની નગરપાલિકાઓ સફાઈકર્મીઓના પ્રશ્નો ઉકેલવામાં ઉદાસિનઃ રાજય સરકાર કરે હસ્તક્ષેપ

Author: નોબત સમાચાર

રાજયની નગરપાલિકાઓ સફાઈકર્મીઓના પ્રશ્નો ઉકેલવામાં ઉદાસિનઃ રાજય સરકાર કરે હસ્તક્ષેપ

ગુજરાત રાજય સફાઈકર્મી મહામંડળની મુખ્યમંત્રીને રજૂઆત

ખંભાળિયા તા. ૬: ગુજરાત રાજયની નગરપાલિકાઓમાં કામ કરતા સફાઈ કામદારોના લાંબા સમયના પડતર પ્રશ્નો અંગે ગુજરાત રાજય સફાઈ કર્મી મહામંડળના પ્રમુખ કસ્તુરભાઈ મકવાણા તથા મહામંત્રી રમેશભાઈ વાઘેલા દ્વારા રાજયના મુખ્ય મંત્રીને રજૂઆત કરાઈ છે.

રજૂઆતમાં જણાવેલ કે રાજયની નગરપાલિકાઓમાં વાલ્મીકી પછાત સમાજનો મોટો વર્ગ વંશ પરંપરાગતથી સફાઈ કામગીરીમાં જોડાયેલ છે. મહાનગરપાલિકામાં સફાઈ કામદારોની નિવૃત્તિ કે સ્વૈચ્છીક નિવૃત્તિ પછી તેમના વારસોને નોકરી પર લેવાની જોગવાઈ છે તે ન.પા.ના કર્મચારી સફાઈ કર્મીને લાગુ પાડવી જોઈએ. રાજયની ન.પા.ઓમાં ૨૦/૩૦ વર્ષોથી સફાઈ કર્મીઓ રોજમદારો તરીકે ફરજ બજાવે છે કાયમી કર્મીના લાભોથી વંચિત છે. રાજયની કેટલીક ન.પા.ને મહેકમ મર્યાદા ધ્યાને લીધા વગર ૫૦ ટકા સફાઈ કામદારો ભરવા સરકારે મંજૂરી આપેલ તેમાં વર્ષોથી કામ કરતા સફાઈ કર્મીને અન્યાય થયો છે તે દૂર કરીને સિનીયોરીટી મુજબ ખાલી જગ્યા ભરવી જોઈએ.

રાજયમાં સ્થાનિક સ્વરાજયની સંસ્થાઓમાં કોન્ટ્રાકટથી કામદારો રાખવા પર સરકારનો પ્રતિબંધ હોવા છતાં કેટલીક ન.પા.ઓમાં નિયમ વિરૂદ્ધ સફાઈકામના કોન્ટ્રાકટ આપીને કામદારોનું મોટું શોષણ થાય છે. તે નાબુદ કરીને સફાઈ કર્મીને સીધા પાલિકા હસ્તક લેવા જોઈએ.

રાજય સરકારે ૩૦-૪-૨૦૦૦ના ગેઝેટથી રાજયની નગરપાલિકાઓમાં ઓકટ્રોય નાબુદ કરીને તેના વિકલ્પની ગ્રાન્ટ શરૂ કરી છે. જેમાં સૌ પ્રથમ નગરપાલિકાના કર્મચારીઓના પગાર ભથ્થા ચૂકવવા ફરજિયાત નિયમ હોવા છતાં મહિનાઓ સુધી પગાર ચૂકવાતા નથી તથા ગરીબ સફાઈ કર્મીઓની દયાજનક સ્થિતિ હોય નિયમિત પગાર કરવા તથા ઓકટ્રોય વિકલ્પ ગ્રાન્ટમાંથી પ્રથમ પગાર ભથ્થા જ ચૂકવાય તેની માંગ કરાઈ છે.

રાજયની ન.પા.ઓના સફાઈ કર્મીઓને પોતાનું ઘર મળે તે માટે રાજય સરકાર દ્વારા ડો. આંબેડકર સફાઈ કામદાર આવાસ યોજના મુકાઈ છે આમ છતાં ન.પા.ઓ દ્વારા પડતર જમીનોમાં સફાઈ કર્મીઓને જમીન પ્લોટ ફાળવાયા નથી જેથી સફાઈ કર્મીઓ ખૂબ જ ખરાબ સ્થિતિના આવાસોમાં રહેતા હોય તાકીદ પાલિકાઓને સફાઈકર્મી માટે જમીન ફાળવવા, મકાનો બાંધી આપવા માંગ પણ કરવામાં આવી છે.

જો આપને આ પોસ્ટ ગમી હોય તો શેર કરો...