વ્યાજે પૈસા લેનાર યુવાને ફડાકા ઝીંકાતા માઠું લાગી આવવાથી ઝેરના પારખા કર્યા

Author: નોબત સમાચાર

વ્યાજે પૈસા લેનાર યુવાને ફડાકા ઝીંકાતા માઠું લાગી આવવાથી ઝેરના પારખા કર્યા

વ્યાજખોર સામે પોલીસમાં નોંધાવાઈ ફરિયાદઃ

જામનગર તા.૬ : જામનગરના એક આસામીએ ત્રણ કટકામાં રૂ.૪૦ હજાર વ્યાજે લીધા પછી વ્યાજ ચૂકવ્યું હોવા છતાં શુક્રવારે તેઓને બોલાવી ગાળો ભાંડી ફડાકા ઝીંકવામાં આવતા માઠું લાગી આવવાથી આ યુવાને ઝેરી દવા પીધી છે. પોલીસે આ યુવાનની ફરિયાદ પરથી ગુન્હો નોંધ્યો છે. વ્યાજખોરે બે કોરા ચેક પણ મેળવી લીધા હતા.

જામનગરના દિગ્વિજય પ્લોટ વિસ્તારની શેરી નં.૫૪ પાછળ આવેલા વિશ્રામવાડીની શેરી નં.૧માં રહેતા પ્રતાપભાઈ મનજીભાઈ દામા નામના યુવાને ગયા જાન્યુઆરી મહિનામાં દિ. પ્લોટ-પ૮માં રહેતા મયુર જમનાદાસ કટારમલ પાસેથી રૂ.૧૦ હજાર દસ ટકાના વ્યાજે લીધા પછી રૂ.૨૦ હજાર તથા બીજા રૂ.૧૦ હજાર પાલી વ્યાજે મેળવી વ્યાજ ભરવાનું શરૂ કર્યું હતું.

ત્રણેક મહિના સુધી વ્યાજ ચૂકવ્યા પછી પ્રતાપભાઈ પાસેથી ખાનગી બેંકના બે કોરા ચેક મેળવી લઈ ગઈ તા.૩ના દિને મયુરે બોલાવી પ્રતાપભાઈ ને ગાળો ભાંડવા ઉપરાંત ફડાકા ઝીંકતા પ્રતાપભાઈને લાગી આવ્યું હતું. આ યુવાને શનિવારે કોઈ ઝેરી દવા પી લીધી હતી. તેઓને સારવાર માટે દવાખાને ખસેડવામાં આવ્યા છે. જ્યાંથી તેઓએ મયુર જમનાદાસ કટારમલ સામે ફરિયાદ નોંધાવી છે. પોલીસે મનીલેન્ડર્સ એક્ટ તેમજ બીએનએસની કલમો હેઠળ ગુન્હો નોંધ્યો છે.

જો આપને આ પોસ્ટ ગમી હોય તો શેર કરો...