જામનગરમાં ગુરુગોવિંદસિંઘજીની જન્મ જયંતીની ઉજવણીએ શોભાયાત્રા

Author: નોબત સમાચાર

જામનગરમાં ગુરુગોવિંદસિંઘજીની જન્મ જયંતીની ઉજવણીએ શોભાયાત્રા

જી.જી. હોસ્પિટલમાં ગુરુગોવિંદસિંઘજીની છબિને ફૂલહારઃ 'ગુરુ કા લંગર-પ્રસાદ' યોજાયું

જામનગરના ગુરુદ્વારા ગુરુ સિંઘ સભામાં આજે સોમવારે ગુરુ ગોવિંદસિંઘજીની ૩પ૯ મી જન્મ જયંતીની ભક્તિભાવપૂર્વક ઉજવણી કરવામાં આવી હતી અને શોભાયાત્રા, સેહજ પાઠ, લંગર પ્રસાદ સહિતના ધાર્મિક કાર્યક્રમનું આયોજન કરવામાં આવ્યું હતું. સૌ પ્રથમ સવારે ૭-૪પ વાગ્યે ગુરુદ્વારાથી શોભાયાત્રા નીકળી હતી, તેમાં બહોળી સંખ્યામાં શીખ સંપ્રદાયના ભાઈઓ-બહેનો જોડાયા હતાં અને જી.જી. હોસ્પિટલમાં ગુરુ ગોવિંદસિંઘજીની છબિને ફૂલહાર કરાયા હતાં. જ્યાં જી.જી. હોસ્પિટલના સુપ્રિટેન્ડેન્ટ ડૉ. દિપક તિવારી, ડૉ. અજય તન્ના, સર્જરી વિભાગના ડૉ. હેમાંગ વસાવડા તથા જી.જી. હોસ્પિટલના સ્ટાફ અને નિવૃત્ત આર્મીમેન તેમજ ગુરુદ્વારાની સંગતની હાજરીમાં જી.જી. હોસ્પિટલમાં પ્રાર્થના કરવામાં આવી હતી તેમજ જી.જી. હોસ્પિટલના દર્દીઓ જલદી સાજા થાય તે માટેની પણ પ્રાર્થના કરાઈ હતી. ત્યારપછી ગુરુદ્વારામાં સેહજપાઠની સમાપ્તિ કરવામાં આવી હતી. આ પ્રસંગે તખત શ્રી પટનાસાહેબના ભાઈ અરવિંદસિંઘ ખાસ ઉપસ્થિત રહ્યા હતાં, અને તેઓ દ્વારા શબ્દ કીર્તનનું આયોજન કરવામાં આવ્યું હતું. ત્યારે બહોળી સંખ્યામાં શ્રદ્ધાળુઓએ ગુરુદ્વારામાં માથું ટેકવીને શબ્દ કીર્તનનો લાભ લીધો હતો. તે પછી બપોરે ગુરુ કા લંગરનું પણ આયોજન કરવામાં આવ્યું હતું. જેમાં પણ બહોળી સંખ્યામાં શ્રદ્ધાળુઓએ પ્રસાદ લીધો હતો.

જો આપને આ પોસ્ટ ગમી હોય તો શેર કરો...