શાળામાં રમતી વખતે બાળક પડી જતાં પિતાએ વિદ્યાર્થીના વાલી પર કર્યાે હુમલો

Author: નોબત સમાચાર

શાળામાં રમતી વખતે બાળક પડી જતાં પિતાએ વિદ્યાર્થીના વાલી પર કર્યાે હુમલો

હંજડાપરના ખેડૂત પર ચાર શખ્સ તૂટી પડ્યાઃ

જામનગર તા. ૩: જામનગરના વસઈ ગામ પાસે આવેલી શાળામાં ફૂટબોલ રમતી વખતે ધક્કામૂક્કીમાં એક વિદ્યાર્થી પડી ગયા પછી તેના પિતા અને એક અજાણ્યા શખ્સે બીજા વિદ્યાર્થીના પિતાને માર માર્યાે હતો. જ્યારે ખેતરમાં પાળો બનાવવાની બાબતે હંજડાપરના ખેડૂતને ચાર શખ્સે લમધારી નાખ્યા હતા.

જામનગરના સમર્પણ સર્કલ નજીક હીરા પાર્ક સોસાયટીમાં રહેતા અરવિંદભાઈ ભવાનભાઈ ભટ્ટ નામના વિપ્ર યુવાનનો પુત્ર વ્રજ તથા જામનગરનો મિલાપ રવિભાઈ ફલીયા જામનગર-ખંભાળિયા ધોરીમાર્ગ પર વસઈ પાસે આવેલી શાળામાં સાથે અભ્યાસ કરે છે. જ્યાં ફૂટબોલ રમતી વખતે અન્ય વિદ્યાર્થી ઓએ કરેલી ધક્કામૂક્કીમાં મિલાપ પડી ગયો હતો.

આ બાળકને ઈજા થતાં તેના પિતા રવિ ફલીયા ઉશ્કેરાયો હતો. તે બાબતનો ખાર રાખી ગઈકાલે બપોરે ખોડિયારકોલોની પાસે તેણે પોતાની સાથે એક શખ્સને લાવી અરવિંદભાઈ સાથે બોલાચાલી કર્યા પછી ક્રિકેટના બેટથી હુમલો કરી માર માર્યાે હતો અને અજાણ્યા શખ્સે ફડાકા ઝીંકી દીધા હતા. આ બાબતની સિટી-સી ડિવિઝન પોલીસ સ્ટેશનમાં અરવિંદ ભાઈએ ફરિયાદ નોંધાવી છે.

ખંભાળિયા તાલુકાના હંજડાપર ગામના પાટીયા પાસે વસવાટ કરતા પ્રવીણભાઈ બાબુભાઈ કણઝારીયા ગઈકાલે સાંજે પોતાના ખેતરમાં પાળો બાંધવા માટે ટ્રેક્ટરમાં ધૂળ ભરીને લઈ જતા હતા ત્યારે દાત્રાણાથી બેરાજા ગામ વચ્ચે રોડ પર તેઓને જયેશ શામજીભાઈ કણઝારીયા, છગનભાઈ માંડણભાઈ, પ્રવીણ છગનભાઈ, નીતિન છગનભાઈ કણઝારીયાએ રોકી ધોકા તથા ઢીકાપાટુથી માર મારી જાનથી મારી નાખવાની ધમકી આપી હતી. પ્રવીણભાઈએ ખંભાળિયા પોલીસ સ્ટેશનમાં ફરિયાદ નોંધાવી છે.

જો આપને આ પોસ્ટ ગમી હોય તો શેર કરો...