માતાજીના દર્શને જતા પદયાત્રીઓ વાહનની હડફેટે ચડતા ત્રણના મૃત્યુઃ પાંચ ઈજાગ્રસ્ત

Author: નોબત સમાચાર

માતાજીના દર્શને જતા પદયાત્રીઓ વાહનની હડફેટે ચડતા ત્રણના મૃત્યુઃ પાંચ ઈજાગ્રસ્ત

હારીજ-ચાણસ્મા હાઈવે પર હીટ એન્ડ રન

અમદાવાદ તા. ૧પઃ હારીજ-ચાણસ્મા રોડ પર માતાજીના દર્શને જતા પદયાત્રીઓને અજાણ્યા વાહને હડફેટે લેતા ૩ ના મૃત્યુ થયા છે અને પાંચ ઘાયલ થયા છે.

ગુજરાતમાં ફરી એકવાર હિટ એન્ડ રનની ઘટના બની છે, જેમાં ત્રણ લોકોના ઘટના સ્થળે જ મોત થયા છે. જ્યારે પાંચથી વધુ લોકો ઈજાગ્રસ્ત થયા છે. હારીજ-ચાણસ્મા હાઈવે પર બહુચરાજીના અંબાલાથી વરાણા ખોડિયાર માતાજીના મંદિરે એક સંઘ પગપાળા જતો હતો તે દરમિયાન અજાણ્યા વાહને સંઘને હડફેટે લીધો હતો.

આ ઘટનાની વધુ માહિતી મુજબ બહુચરાજીના અંબાલા ગામમાંથી ઠાકોર પરિવારનો સંઘ પગપાળા વરાણામાં ખોડિયાર માતાજીના દર્શનાર્થે જઈ રહ્યો હતો ત્યારે મોડી રાત્રે હારીજ-ચાણસ્મા હાઈવે પર દાંતરવાડે ગામ નજીક અજાણ્યા વાહને સંઘને હડફેટે લેતા ત્રણ લોકોના ઘટનાસ્થળે જ મોત થયા હતાં. જ્યારે પાંચ લોકો ગંભીર રીતે ઈજાગ્રસ્ત થયા હતાં. જેમાં ચાર લોકોની હાલત ખૂબ જ ગંભીર છે. હાલ ઈજાગ્રસ્ત લોકોને તાત્કાલિક નજીકની હોસ્પિટલમાં સારવાર અર્થે ખસેડવામાં આવ્યા છે. આ ઘટનાની જાણ થતા જ પોલીસની ટીમે ઘટના સ્થળે પહોંચીને આગળની કાર્યવાહી હાથ ધરી છે.

જો આપને આ પોસ્ટ ગમી હોય તો શેર કરો...