ખંભાળિયા પાસે મોટરમાં દારૂની ૧૭૭ બોટલ લઈને જતાં બે શખ્સની ધરપકડ

Author: નોબત સમાચાર

ખંભાળિયા પાસે મોટરમાં દારૂની ૧૭૭ બોટલ લઈને જતાં બે શખ્સની ધરપકડ

મોટર, દારૂ, બે ફોન સહિત છ લાખનો મુદ્દામાલઃ

જામનગર તા. ૧ઃ ભાણવડથી મીઠાપુર તરફ એક મોટરમાં અંગ્રેજી શરાબનો જથ્થો લઈ જવાનો હોવાની બાતમી પરથી શનિવારે સાંજે ડીવાયએસપી કચેરીના સ્ટાફે વોચ રાખતા ભાણવડ તરફથી આવેલી અર્ટીગા મોટરમાંથી દારૂની ૧૭૭ બોટલ મળી આવી હતી. આ જથ્થા સાથે બે શખ્સની ધરપકડ કરાઈ છે. તેઓએ સપ્લાયરનું નામ આપ્યું છે. પોલીસે મોટર, દારૂ, બે ફોન કબજે કર્યા છે.

ખંભાળિયાથી ભાણવડ અને બીજી તરફ દ્વારકા સુધી જતા માર્ગ પર શનિવારે સાંજે દારૂની હેરાફેરી થવાની બાતમી ખંભાળિયા વિભાગના ડીવાયએસપીની કચેરીના એએસઆઈ શક્તિરાજસિંહ, સુખદેવસિંહ જાડેજાને મળતા ડીવાયએસપી ડો. હાર્દિક પ્રજાપતિની સૂચનાથી રીડર પીએસઆઈ પી.ડી. વાંદા તથા સ્ટાફે વોચ રાખી હતી.

તે દરમિયાન ભાણવડ તરફથી ધસી આવતી જીજે-૩૨-બી ૫૮૭૩ નંબરની અર્ટીગા મોટરને રોકી લેવામાં આવી હતી. તે મોટરની તલાશી લેવાતા તેમાંથી ભારતીય બનાવટના અંગ્રેજી શરાબની જુદી જુદી બે બ્રાંડની ૧૭૭ બોટલ મળી આવી હતી.

દારૂના આ જથ્થા સાથે આરંભડાના મહેકભા મૂળુભા કેર અને મીઠાપુરના શ્રીનાથ ઉર્ફે કિરીટ જોષી નામના બે શખ્સને ઝડપી લેવામાં આવ્યા છે. આ શખ્સોએ ભાણવડના રાણપર ગામના રાજુ કોડિયાતર પાસેથી આ જથ્થો લીધાની અને મીઠાપુર રહેતા હોવાની કબૂલાત કરી છે. પોલીસે બે મોબાઈલ, મોટર, દારૂ મળી કુલ રૂ.૬,૧૦,૮૦૦નો મુદ્દામાલ કબજે કર્યાે છે.

જો આપને આ પોસ્ટ ગમી હોય તો શેર કરો...