Author: નોબત સમાચાર
જામનગરમાં ગેરકાયદે ઘાસ વેંચતા વિક્રેતાઓ સામે ત્રણ દિવસથી કડક પગલાઃ વધુ સાત ટન ઘાસ કબજે
રાત્રિના સમયે ઘૂસાડી દેવાયેલો ઘાંસનો જથ્થો જપ્ત
જામનગર તા. ર૪: જામનગરના શહેરી વિસ્તારમાં આજે સવારે કેટલ પોલિસીના અમલ માટે મનપાના તંત્ર દ્વારા કડક કાર્યવાહી કરી વધુ સાત ટન ઘાસ કબજે કરાયું છે. એસ્ટેટ શાખાની ત્રણ ટૂકડીએ શહેરમાં અલગ-અલગ વિસ્તારમાંથી રાત્રિ દરમિયાન ઉતારી લીધેલું ઘાસ જપ્ત કર્યુ હતું.
જામનગર શહેરમાં ગેરકાયદે રીતે ઘાસ ચારાનું વેંચાણ કરવામાં આવે છે, અને વહેલી સવારે શહેરના કેટલાક વિસ્તારોને જાહેરમાં ઢોરવાડો બનાવી દેવામાં આવે છે. તેમાંથી નગરજનોને મુક્તિ મળે તે માટેની જામનગર મહાનગરપાલિકાના કમિશ્નર દ્વારા છેલ્લા એકાદ સપ્તાહથી કવાયત કરવામાં આવી છે અને કેટલ પોલિસીનો કડક હાથે અમલ કરાવવામાં આવે છે. ઉપરાંત અદાલતના હુકમનું પાલન કરવા માટે શહેરને રસ્તે રઝળતા ઢોરથી મુક્ત કરવા માટેની વિશેષ ઝુંબેશ ચલાવાઈ રહી છે, ત્યારે શહેરમાં ઘાસનો જથ્થો ઘુસાડનારાઓ ઉપર આજે ફરી તવાઈ બોલાવવામાં આવી હતી. ઘાસચારાનું વેંચાણ કરનારા સામે છેલ્લા ત્રણ દિવસથી વહેલી સવારથી હાથ ધરાયેલી ઝુંબેશ હેઠળ ઘાસચારાના વિક્રેતાઓ દ્વારા વહેલી સવારના બદલે ગઈકાલે રાત્રે અલગ-અલગ વિસ્તારમાં ઘાસ ઉતારી લેવામાં આવ્યું હતું. પરંતુ મહાનગરપાલિકાની ટૂકડીએ તેની વિગતો પણ જાણી લીધી હતી અને આજે સવારે જે સ્થળે ઘાસ ઉતારી લેવામાં આવ્યું હતું, તે તમામ સ્થળે પહોંચી જઈ કેટલ પોલિસીનો અમલ કરાવવા માટેની કડક કામગીરી હાથ ધરાઈ હતી.
જામનગર મહાનગરપાલિકાના એસ્ટેટ અધિકારી નીતિન દીક્ષિતની રાહબરી હેઠળ દબાણ હટાવ અધિકારી અનવર ગજ્જણ તેમજ ધર્મેન્દ્રસિંહ જાડેજા અને તેઓની અલગ-અલગ ત્રણ ટીમ દ્વારા શહેરના કાલાવડ નાકા બહાર, મયુરનગર, ગુલાબનગર વિગેરે અલગ-અલગ વિસ્તારમાં ત્રણ ટૂકડી વહેલી સવારે ૬.૦૦ વાગ્યામાં જ દોડતી કરાવી દેવામાં આવી હતી અને ઘાસનો જથ્થો લઈને ઉતારી જનારા સામે કડક પગલા લેવામાં આવ્યા હતાં. અલગ-અલગ વાહનોમાં અંદાજે ૭ ટન જેટલો ઘાસનો જથ્થો જામનગર શહેરમાં ઉતારી લેવામમાં આવ્યો હતો. જે તમામ જથ્થો એકત્ર કરી લેવાયો હતો, અને મહાનગરપાલિકા સંચાલિત ઢોરવાડામાં પશુઓના ખોરાક માટે મોકલી દેવામાં આવ્યો છે.
ઉપરોક્ત તમામ વિક્રેતાઓને અંતિમ ચેતવણી આપી દેવામાં આવી છે, અને ફરીથી શહેરની અંદર ઘાસચારાનો જથ્થો લઈને આવશે, તો તેઓની સામે કડક પગલા લેવામાં આવશે, તેવી પણ ચેતવણી આપી દેવાઈ છે. વહેલી સવારમાં જ મહાનગરપાલિકાના તંત્રની આ કાર્યવાહીને લઈને શહેરી વિસ્તારમાં ઘાસચારાનું વેંચાણ કરતા તત્ત્વોમાં ફફડાટ મચી ગયો છે.
જો આપને આ પોસ્ટ ગમી હોય તો શેર કરો...
Follow us: આ જ પ્રકારની બીજી પોસ્ટ માટે અમારી એપ ડાઉનલોડ કરો.
Android: https://rb.gy/surhtv
Apple ios: https://rb.gy/cee4r9
Social Media
ફોટો સ્ટોરી માટે અમારા ઇન્સ્ટાગ્રામ પેઈજને ફોલ્લો કરો
https://www.instagram.com/nobatdaily?r=nametag
વિડિયો માટે અમારી યુ-ટ્યૂબ ચેનલને સબસ્ક્રાઈબ કરો
https://youtube.com/@Nobatofficial
અન્ય સમાચારો
