રાજ્યસભાના સાંસદ પરિમલભાઈ નથવાણી દ્વારા દ્વારકાધીશ મંદિરના શિખરે નૂતન ધ્વજારોહણ

Author: નોબત સમાચાર

રાજ્યસભાના સાંસદ પરિમલભાઈ નથવાણી દ્વારા દ્વારકાધીશ મંદિરના શિખરે નૂતન ધ્વજારોહણ

વડાપ્રધાન નરેન્દ્રભાઈ મોદીના જન્મદિન નિમિત્તે

દ્વારકા તા. ૧૭: દેશના વડાપ્રધાન અને ગુજરાતના પનોતા પુત્ર નરેન્દ્રભાઈ મોદીનો આજે ૭પ મો જન્મદિન હોય, તેમની ઉપર ભગવાન દ્વારકાધીશજીની કૃપા વરસતી રહે તેવી પ્રાર્થના અને જન્મદિનની શુભેચ્છા સાથે રાજ્યસભાના સાંસદ અને રિલાયન્સ ગ્રુપના ડાયરેક્ટર પરિમલભાઈ નથવાણીએ તેમના પ્રતિનિધિ ગુગળી જ્ઞાતિના મંત્રી કપિલભાઈના હસ્તે દ્વારકાધીશ મંદિરના શિખરે નૂતન ધ્વજારોહણનું આયોજન કર્યું હતું.

જગદ્ગુરુ શંકરાચાર્ય સદાનંદ સરસ્વતીજીની પીઠના પરિસરમાં આજે સવારે બાવન ગજ્જ ભગવા/કેસરી રંગની ધ્વજાજીનું પૂજન કપિલભાઈ વાયડા તથા દ્વારકાધીશજીની યજમાન વૃત્તિ કરતા પંડાઓ દ્વારા કરવામાં આવ્યું હતું. શાસ્ત્રોક્ત મંત્રોચ્ચાર સાથે વિષ્ણુ સહસ્ત્ર પાઠ કરવામાં આવ્યા હતાં. ધ્વજાજીની આરતી કરી ધ્વજાજીને દ્વારકાધીશજીના ચરણોમાં ધરવામાં આવી હતી. સમગ્ર પૂજાવિધિ આચાર્ય વત્સલભાઈ પુરોહિતે કરાવી હતી. પૂજારી ડાયાલાલે ધ્વજા ઉપર અબીલ-ગુલાલ તથા પુષ્પમાળા તુલસી સાથે અર્પણ કર્યા હતાં. ત્યારપછી મંદિરને પરિક્રમાપૂર્ણ કરી ભાવિકો સાથે ધ્વજારોહણ કરવામાં આવ્યું હતું.

અત્રે ઉલ્લેખનિય છે કે, પરિમલભાઈ નથવાણી દ્વારકાધીશજીના પરમભક્ત છે અને ગુજરાતના સાસણ ગીર તથા દ્વારકાના વિકાસમાં તેઓની હંમેશાં મહત્ત્વની ભૂમિકા રહી છે.

જો આપને આ પોસ્ટ ગમી હોય તો શેર કરો...