સગાઈ તૂટી જતાં ઉશ્કેરાયેલા ખરેડીના શખ્સ સહિત પાંચે યુવાનને લમધાર્યાે

Author: નોબત સમાચાર

સગાઈ તૂટી જતાં ઉશ્કેરાયેલા ખરેડીના શખ્સ સહિત પાંચે યુવાનને લમધાર્યાે

સગાઈ થઈ હતી તે યુવતીએ અન્યત્ર પ્રેમલગ્ન કર્યા હતાઃ

જામનગર તા. ૧૭: જામનગરના એક યુવતીની કાલાવડના ખરેડીના શખ્સ સાથે અગાઉ સગાઈ થઈ હતી. તે પછી આ યુવતીએ પોતાના મનગમતા પાત્ર સાથે પ્રેમ લગ્ન કરી લેતાં સગાઈ તૂટી જવાથી ઉશ્કેરાયેલા શખ્સ તથા તેના ચાર સાગરિતે ગઈકાલે ધોકા-પાઈપથી આ યુવતીના માતાના ઘેર જઈ ધમાલ મચાવવા ઉપરાંત તે યુવતીના પતિને સારી પેઠે લમધારી નાખ્યો હતો. પોલીસે પાંચ સામે ગુન્હો નોંધ્યો છે.

જામનગરના કાલાવડ નાકા બહાર આવેલી અલસફા સોસાયટીની શેરી નં.૩માં રહેતા મહંમદ હનીફભાઈ ઈજારાવાલા નામના મેમણ યુવાન તથા તેમના પરિજનો ગઈકાલે સાંજે મહારાજા સોસાયટીમાં હતા ત્યારે ત્યાં કાલાવડ તાલુકાના ખરેડી ગામના સલમાન લાખાભાઈ દલ, અલ્ફાઝ અલાદભાઈ, ઈરફાન મેરૂભાઈ દલ, ફૈઝલ સાબીદભાઈ દલ તથા મહારાજા સોસાયટીમાં રહેતા ગુલમામદ અબ્દુલ દલ ધોકા, પાઈપ સાથે ધસી આવ્યા હતા.

આ વ્યક્તિઓએ યાસ્મીનબેન મહેબુબભાઈ દલના ઘરમાં ઘૂસીને તોડફોડ મચાવવા ઉપરાંત મહંમદહનીફ તેમજ તેની પત્ની મહેક તથા સાળી, નાની સાસુ, મોટા સાસુ યાસ્મીનબેન પર હુમલો કરી આડેધડ માર માર્યાે હતો. જેમાં મહંમદહનીફને ફ્રેક્ચર સહિતની ઈજા થઈ હતી.

ઉપરોક્ત બઘડાટી વેળાએ કોઈએ ૧૦૮ને કોલ કરતા એમ્બ્યુલન્સ દોડી આવી હતી. તેમાં બેસવા જતી વેળાએ પણ મહંમદહનીફને ધોકાથી ગુલમામદે ફટકો માર્યાે હતો. તમામ ઈજાગ્રસ્તને સારવાર માટે જી.જી. હોસ્પિટલમાં ખસેડવામાં આવ્યા છે. જ્યાંથી મોડીરાત્રે સિટી એ ડિવિઝન પોલીસ સ્ટેશનમાં ફરિયાદ કરવામાં આવી છે.

ફરિયાદમાં જણાવાયા મુજબ મહંમદહનીફના પત્ની મહેક મહેબુબભાઈ સાથે અગાઉ ખરેડીના સલમાન લાખાભાઈની સગાઈ થઈ હતી. તે દરમિયાન મહેક તથા મહંમદ હનીફે પ્રેમલગ્ન કરી લેતા સલમાનનો સંબંધ તૂટી ગયો હતો. આ બાબતનો ખાર રાખી પાંચેય શખ્સે ગઈકાલે જ્યારે ઈદનો તહેવાર હતો અને તેની મુબારકબાદી દેવા માટે મહંમદ હનીફ તથા મહેક આવ્યા હતા ત્યારે મહેકના માતાના ઘેર સલમાન તથા તેના મિત્ર અલ્ફાઝ, ઈરફાન, ફૈઝલ તથા ગુલમામદ આવી ચઢયા હતા. પોલીસે ગુન્હો નોંધી તપાસ શરૂ કરી છે.

જો આપને આ પોસ્ટ ગમી હોય તો શેર કરો...