ખંભાળીયામાં ભારતીય જનતા પાર્ટીના મધ્યસ્થ ચૂંટણી કાર્યાલયનું ઉદ્ઘાટન

Author: નોબત સમાચાર

ખંભાળીયામાં ભારતીય જનતા પાર્ટીના મધ્યસ્થ ચૂંટણી કાર્યાલયનું ઉદ્ઘાટન

રાજ્યસભાના સાંસદ પરિમલભાઈ નથવાણીના હસ્તે

ખંભાળીયા તા. ૩૦ : જામનગર ૧ર-લોકસભા બેઠકના ભારતીય જનતા પાર્ટીના ઉમેદવાર અને સતત બે ટર્મ માટે ચૂંટાયેલા વર્તમાન સંસદ સભ્ય પૂનમબેન માડમના પ્રચાર-પ્રસાર અને સંકલન અર્થે દેવભૂમિ દ્વારકા જિલ્લાના વડા મથક ખંભાળીયામાં ભાજપના મધ્યસ્થી ચૂંટણી કાર્યાલયનું ઉદ્ઘાટન રાજ્યસભાના સાંસદ પરિમલભાઈ નથવાણીના હસ્તે કરવામાં આવ્યું હતું. મધ્યસ્થ કાર્યાલયના ઉદ્ઘાટન પૂર્વે ખંભાળીયાના મુખ્ય માર્ગો પર પૂનમબેન માડમનો વિશાળ ભવ્ય રોડ શો યોજાયો હતો.

ખંભાળીયામાં સાંજે ચાર રસ્તા પાસેથી રોડ શો નો આરંભ થયો હતો. શહેરમાં રોડ શો ના રૂટ ઉપર સમસ્ત પ્રજાપતિ સમાજ, સમસ્ત ચારણ સમાજ, સમસ્ત સતવારા સમાજ, સમસ્ત મુસ્લિમ સમાજ, અનુસૂચિત જાતિ સમાજ, વાંઝા જ્ઞાતિ મંડળ, સમસ્ત વાલ્મીકી સમાજ, દશા સોરઠીયા વણિક સમાજ, સમસ્ત સૌરાષ્ટ્ર-કચ્છ બ્રહ્મ સમાજ, લોહાણા સમાજ ટ્રસ્ટ, સમસ્ત ગુર્જર સુથાર સમાજ, સમસ્ત સોની સમાજ, સોના ચાંદી વેપારી એસોસિએશન, સમસ્ત લુહાર, સુથાર સમાજ, સમસ્ત વાણંદ સમાજ, સમસ્ત મોચી સમાજ, સમસ્ત આહિર સમાજ, સમસ્ત કંસારા સમાજ, દશનામ ગૌસ્વામી સમાજ, સમસ્ત રામાનંદી સમાજ સહિતના સમાજ/સંસ્થાઓએ લગભગ અઢારેય વર્ણના સમાજના આગેવાનો, હોદ્દેદારોએ પૂનમબેનનું ફૂલહારથી સ્વાગત-સન્માન કરી તેમને સમર્થન આપવાનો સંકલ્પ વ્યક્ત કર્યો હતો. રોડ શો માં નગરજનોએ પૂનમબેનના સમર્થકો, સંગઠનના હોદ્દેદારો, અગ્રણીઓના કાફલા ઉપર પુષ્પવર્ષા કરી તેમને આવકાર્યા હતાં.

રોડ શો પૂર્ણ થયા પછી જોધપુર નાકા પાસે ભાજપના ચૂંટણી મધ્યસ્થ કાર્યાલયનું મૂળ ખંભાળીયાના વતની અને રાજયસભાના સાંસદ પરિમલભાઈ નથવાણીના હસ્તે ઉદ્ઘાટન કરવામાં આવ્યું હતું.

ઉદ્ઘાટન સમારોહમાં પરિમલભાઈ નથવાણીએ પ્રાસંગિક ઉદ્બોધન કરી પૂનમબેન માડમને જંગી સરસાઈથી વિજેતા બનાવવા સૌને અપીલ કરી હતી. પૂનમબેન માડમે કેેન્દ્ર સરકાર દ્વારા હાલારના બન્ને જિલ્લામાં છેલ્લા દસ વર્ષમાં થયેલા વિકાસકામોની ઝાંખી રજુ કરી નરેન્દ્રભાઈ મોદીને પુનઃ સતાનું સુકાન સોંપવા અનુરોધ કર્યો હતો.

રોડ શો તથા ઉદ્ઘાટન સમારોહમાં જિલ્લા ભાજપ પ્રમુખ મયુરભાઈ ગઢવી, ગઢવી સમાજના આગેવાન ઘેલુભાઈ ગઢવી, સતવારા સમાજના આગેવાન હરિભાઈ નકુમ, જામનગર-દ્વારકા રાજપુત સમાજના પ્રમુખ અને જિ.પં. પૂર્વ પ્રમુખ પી.એસ. જાડેજા, વિસ્તારક નટવરભાઈ પટેલ, ન.પા.પ્રમુખ રચનાબેન મોટાણી, જિ.પં. ઉપપ્રમુખ ચાવડા, શહેર ભાજપ પ્રમુખ અનિલભાઈ તન્ના સહિતના તાલુકા તથા જિલ્લાના આગેવાનો, કાર્યકરો, ન.પા.ના હોદ્દેદારો, તા.પં. જિ.પં.ના સભ્યો હાજર રહ્યા હતાં.

જો આપને આ પોસ્ટ ગમી હોય તો શેર કરો...