પૂનમબેન માડમનો ઝંઝાવાતી પ્રચારઃ લતીપુર, હમાપર, ધ્રોલમાં પ્રચાર કાર્યક્રમોમાં ઉમટી પડતી જનમેદની

Author: નોબત સમાચાર

પૂનમબેન માડમનો ઝંઝાવાતી પ્રચારઃ લતીપુર, હમાપર, ધ્રોલમાં પ્રચાર કાર્યક્રમોમાં ઉમટી પડતી જનમેદની

ધ્રોલ તાલુકામાં ભાજપના ઉમેદવાર

જામનગર તા. ૩૦: ૧ર-જામનગર લોકસભા બેઠકના ઉમેદવાર અને વર્તમાન સાંસદ સભ્ય પૂનમબેન માડમે ધ્રોલ તાલુકામાં ઝંઝાવાતી પ્રવાસ-પ્રચાર કરી ગ્રામજનોને આ ચૂંટણીમાં કમળના નિશાળ પર મતદાન કરી કેન્દ્રમાં સતત ત્રીજી વખત નરેન્દ્રભાઈ મોદીના નેતૃત્વમાં ભારતીય જનતા પાર્ટીની સરકાર બનાવવા અપીલ કરી હતી.

ભાજપના ઉમેદવાર પૂનમબેન માડમે લતીપુર જિ.પં. બેઠક વિસ્તારને આવરી લેતા વિસ્તારમાં ગ્રામજનો સાથે સંવાદ બેઠક યોજી હતી. જ્યારે ધ્રોલ તાલુકાની ખારવા જિ.પં. બેઠક વિસ્તારમાં હમાપર ગામમાં વિશાળ રોડ-શો યોજી મતદારો અને ગ્રામજનોનું અભિવાદન જીલ્યું હતું. હમાપરમાં તેમણે ગ્રામજનોને સંબોધન કરી ભારતને ર૦૪૭માં સંપૂર્ણ વિકસીત રાષ્ટ્ર કરવાના નરેન્દ્રભાઈના સંકલ્પને સિધ્ધ કરવા ભાજપને મત આપવા હાકલ કરી હતી.

ધ્રોલ શહેરમાં પૂનમબેન માડમનો ભવ્ય રોડ-શો યોજાયો હતો. 'અબકી બાર ૪૦૦ કે પાર' અને 'ફીર એકબાર મોદી સરકાર'ના નારા સાથે શહેરમાં રોડ-શો યોજાયો હતો. ત્યાર પછી યોજાયેલી જાહેર સભામાં મોટી સંખ્યામાં ધ્રોલના નગરજનો તથા આસપાસના ગામના લોકો ઉમટી પડયા હતાં.

આ તકે પૂનમબેન માડમે છેલ્લા દસ વર્ષમાં કેન્દ્રની તથા રાજ્યની ભાજપ સરકાર દ્વારા થયેલા અને થઈ રહેલા અસંખ્ય મહત્વપૂર્ણ વિકાસ કામોની વિગતો રજુ કરી હતી. આ વખતની ચૂંટણી ભારતના યુવાધનના ઉજ્જવળ ભવિષ્ય માટે અતિ મહત્વની હોય, કેન્દ્રમાં જામનગરથી પણ એક કમળની ભેટ ધરવા તેમણે સૌને અનુરોધ કર્યાે હતો.

ભાજપના ઉમેદવાર પૂનમબેન માડમના પ્રચાર અભિયાનમાં રાજ્યના કેબીનેટ મંત્રી રાઘવજીભાઈ પટેલ, ધારાસભ્ય મેઘજીભાઈ ચાવડા, જિલ્લા ભાજપ પ્રમુખ રમેશભાઈ મુંગરા, મહામંત્રી અભિષેકભાઈ પટવા, લોકસભા બેઠકના પ્રભારી ભાનુભાઈ મહેતા, ધ્રોલ તાલુકા ભાજપના પૂર્વ પ્રમુખ રાજભા જાડેજા, જિ.પં. સભ્ય લખધીરસિંહ જાડેજા, ધ્રોલ તાલુકા ભાજપ મહામંત્રી પ્રદીપસિંહ જાડેજા, તા.પં. પૂર્વ પ્રમુખ પોલુભા જાડેજા, ધ્રોલ તાલુકા ભાજપ યુવા મોરચા પ્રમુખ ક્રિપાલસિંહ જાડેજા, તા. પં. સભ્ય મહેન્દ્રસિંહ જાડેજા, તાલુકા ભાજપ પૂર્વ મહામંત્રી બ્રિજરાજસિંહ જાડેજા, ધ્રોલ તાલુકા ભાજપ પ્રમુખ નવલભાઈ મુંગરા, મહેન્દ્રભાઈ રાઘવજીભાઈ પટેલ, રસીકભાઈ ભંડેરી, ધ્રોલ તાલુકાના સંગઠનના હોદ્દેદારો, તા.પં. સભ્યો, ન.પા. સભ્યો, અન્ય આગેવાનો વિવિધ સમાજના ભાઈઓ બહેનો મોટી સંખ્યામાં હાજર રહ્યા હતાં. ઠેર-ઠેર પૂનમબેન માડમનું વિવિધ જ્ઞાતિ, મહિલાઓ દ્વારા સ્વાગત-સન્માન કરી તેમને જંગી લીડથી વિજયની ખાત્રી આપી હતી.

જો આપને આ પોસ્ટ ગમી હોય તો શેર કરો...