સુરજકરાડીના યુવાનનું ટ્રેન હેઠળ ચગદાઈ જવાથી મૃત્યુઃ પોલીસ દ્વારા શરૂ કરાઈ તપાસ

Author: નોબત સમાચાર

સુરજકરાડીના યુવાનનું ટ્રેન હેઠળ ચગદાઈ જવાથી મૃત્યુઃ પોલીસ દ્વારા શરૂ કરાઈ તપાસ

નિદ્રાધીન હાલતમાં વડત્રાના પ્રૌઢનું થયું મૃત્યુઃ

જામનગર તા. ૨૯ઃ ખંભાળિયાના વડત્રા ગામમાં રાત્રિના સમયે નિદ્રાધીન થયેલા એક પ્રૌઢ ઉંઘની હાલતમાં જ મોતની ગોદમાં સરી ગયા છે. જયારે ઓખામંડળના સુરજકરાડીમાં રહેતા એક યુવાન કોઈ રીતે ટ્રેન હેઠળ ચગદાઈ જઈ મોતને શરણ થયા છે. પોલીસે બંને બનાવની તપાસ આદરી છે.

ખંભાળિયા તાલુકાના વડત્રા ગામમાં રહેતા જુવાનસંગ દાજીભા ચુડાસમા નામના પ્રૌઢ મંગળવારની રાત્રે પોતાના ઘરમાં નિદ્રાધીન થયા પછી ગઈકાલે સવારે નહીં ઉઠતા તેઓને જગાડવા માટે બ્રિજરાજસિંહ રામસંગજી ચુડાસમા ગયા હતા. આ પ્રૌૈઢ બેભાન જેવી હાલતમાં જણાઈ આવતા તેઓને સારવાર માટે ખંભાળિયાની હોસ્પિટલમાં ખસેડાયા હતા. જ્યાં તેઓનું મૃત્યુ થયું છે. બ્રિજરાજસિંહનું પોલીસે નિવેદન નોંધ્યું છે.

દ્વારકા તાલુકાના મીઠાપુર નજીકના સુરજકરાડી ઉદ્યોગનગરમાં રહેતા અજીતસિંહ રણજીતસિંહ રાઠોડ (ઉ.વ.૩૩) નામના યુવાન મંગળવારની રાત્રિથી બુધવારની સવાર સુધીમાં કોઈ રીતે મીઠાપુર રેલવે સ્ટેશનથી સુરજકરાડી વચ્ચેના ફાટક પર પહોંચ્યા હતા. તેઓ ત્યાંથી પસાર થયેલી કોઈ ટ્રેન હેઠળ ચગદાઈ ગયા છે. તેની જાણ ગઈકાલે સવારે છએક વાગ્યે થવા પામી હતી. દાનસિંહ હમીરજી રાઠોડે મૃતદેહની ઓળખ આપી હતી. પોલીસે તેઓનું નિવેદન નોંધી તપાસ હાથ ધરી છે.

જો આપને આ પોસ્ટ ગમી હોય તો શેર કરો...