આમરા ગામના પાટિયા પાસે મોટરમાંથી મળી દારૃની ૬૦ બોટલઃ બુટલેગરની અટક

Author: નોબત સમાચાર

આમરા ગામના પાટિયા પાસે મોટરમાંથી મળી દારૃની ૬૦ બોટલઃ બુટલેગરની અટક

કાલાવડ નાકાના પુલ પરથી બીયરના ત્રણ ટીન કબજેઃ

જામનગર તા. ૨૯ઃ જામનગર-ખંભાળિયા ધોરીમાર્ગ પર આમરા ગામના પાટિયા પાસેથી ગઈકાલે સાંજે પસાર થતી એક મોટરને રોકાવી પોલીસે ચેક કરતા તેમાંથી ભારતીય બનાવટના અંગ્રેજી શરાબની બે બ્રાંડની ૬૦ બોટલ મળી આવી હતી. આ જથ્થા સાથે કુખ્યાત બુટલેગરની ધરપકડ કરાઈ છે. તેણે સાગરિતનું નામ આપ્યું છે. શહેરમાંથી ત્રણ ટીન બીયર સાથે એકને પકડી પાડવામાં આવ્યો છે.

જામનગર-ખંભાળિયા ધોરીમાર્ગ પર આવેલા આમરા ગામના પાટિયા પાસે ગઈકાલે સાંજે દારૃની હેરાફેરી થઈ રહી હોવાની બાતમી મળતા સિક્કા પોલીસ સ્ટેશનના સ્ટાફે વોચ ગોઠવી હતી.

તે દરમિયાન સાડા સાતેક વાગ્યે જીજે-૩૭-એમ ૩૬૨૩ નંબરની સ્વીફ્ટ મોટર પસાર થઈ હતી. તે મોટરને પોલીસે રોકાવી તલાશી લેતા તેમાંથી રોયલ સ્ટગ બ્રાંડની ૩૬ બોટલ તથા રોયલ ચેલેન્જ બ્રાંડની ૨૪ બોટલ મળી શરાબની કુલ ૬૦ બોટલ મળી આવી હતી. તે જથ્થા સાથે જામનગરની નિલકંઠ સોસાયટી પાછળ તિરૃપતિ-૪માં રહેતા બિપીન કારાભાઈ મુછડીયા ઉર્ફે લાકડી નામના શખ્સની ધરપકડ કરવામાં આવી છે. તેણે પોતાના સાગરિત યાદવનગરવાળા મયુર ભાટીયા ઉર્ફે મયલાનું નામ આપ્યંુ છે. પોલીસે બોટલ, રૃા.પ લાખની મોટર કબજે કરી લીધા છે.

જામનગરના કાલાવડ નાકા પાસે આવેલા પુલ પરથી ગઈકાલે રાત્રે જઈ રહેલા ઈરફાન હુસેન શેખ નામના સીલ્વર સોસાયટીવાળા શખ્સને પોલીસે રોકી ચેક કરતા તેના કબજામાંથી બીયરના ત્રણ ટીન મળી આવ્યા હતા.

લાલપુર શહેરમાં મેકરણ હોટલ નજીકથી ગઈકાલે સાંજે જઈ રહેલા કમલેશ દેવાણંદ નંદાણીયા નામના શખ્સને પોલીસે દારૃના એક ચપલા સાથે પકડી લીધો છે.

જો આપને આ પોસ્ટ ગમી હોય તો શેર કરો...