લાલપુરના હરીપરમાં અગાસી પરથી પટકાઈ પડેલા વૃદ્ધાનું નિપજ્યું મૃત્યુ

Author: નોબત સમાચાર

લાલપુરના હરીપરમાં અગાસી પરથી પટકાઈ પડેલા વૃદ્ધાનું નિપજ્યું મૃત્યુ

વૃદ્ધાના શરીર પર વન્યપ્રાણીઓએ ભરી લીધા બચકાઃ

જામનગર તા. ૯: લાલપુરના હરીપર ગામમાં રહેતા એક વૃદ્ધા ગુરૂવારે રાત્રે પોતાના મકાનના બીજા માળેથી કોઈ રીતે પટકાઈ પડ્યા પછી માથામાં ઈજા થવાથી મૃત્યુ પામ્યા છે. રાત્રે તેઓ પછડાયા પછી કોઈ જંગલી જનાવર તેમના શરીરમાં બચકા ભરી ગયા હોવાનું જણાઈ આવ્યું છે. પોલીસે અપમૃત્યુ અંગે નોંધ કરી છે.

લાલ૫ુર તાલુકાના હરીપર ગામમાં રહેતા કંચનબા હરીસંગ જાડેજા (ઉ.વ.૯પ) નામના વૃદ્ધા ગુરૂવારે રાત્રે પરિવાર સાથે ભોજન લીધા પછી તેમના રહેણાંક મકાનના બીજા માળે સૂવા માટે ગયા હતા. તે પછી રાત્રે કોઈ સમયે તેઓ ઉઠ્યા હતા.

ઉંમરના કારણે થોડા અશક્ત રહેતા આ વૃદ્ધા બીજા માળેથી અકસ્માતે જમીન પર પટકાઈ પડ્યા હતા. તેઓને માથામાં ગંભીર ઈજા થઈ હતી. આ બનાવની અન્ય પરિજનોને જાણ થઈ ન હતી. તે પછી ગઈકાલે સવારે આઠેક વાગ્યે કંચનબા પટકાઈ પડેલી હાલતમાં જોવા મળ્યા હતા. કેટલાક કલાકો સુધી આ વૃદ્ધા બેભાન જેવી હાલતમાં ત્યાં પડ્યા રહ્યા હશે તેથી રાત્રિના સમયે કોઈ જંગલી જનાવરો તેઓને બચકા ભરી ગયા હતા.

આ વૃદ્ધાનું મૃત્યુ નિપજ્યું છે. તેમના પરિવારના યુવરાજસિંહ રણજીતસિંહ જાડેજાએ પોલીસને જાણ કરી છે. લાલપુર પોલીસે અપમૃત્યુ અંગે નોંધ કરી છે.

જો આપને આ પોસ્ટ ગમી હોય તો શેર કરો...