નવસારીઃ ગણદેવીના ગોડાઉનમાં ભીષણ આગથી ત્રણ ભડથું: ત્રણની સ્થિતિ ગંભીર

Author: નોબત સમાચાર

નવસારીઃ ગણદેવીના ગોડાઉનમાં ભીષણ આગથી ત્રણ ભડથું: ત્રણની સ્થિતિ ગંભીર

હજુ અનેક લોકો આગમાં ફસાયાઃ ફાયરબ્રિગેડ પહોંચી

નવસારી તા. ૯: નવસારીના ગણદેવીમાં એક ગોડાઉનમાં ભીષણ આગ લાગતા ત્રણ વ્યક્તિના સળગી જતા મોત થયા છે અને ગંભીર રીતે દાઝેલા બીજા ત્રણ સારવાર હેઠળ છે. ફાયરબ્રિગેડે આગ બુઝાવવાના પ્રયાસો શરૂ કર્યા છે.

ગુજરાતના નવસારી જિલ્લાથી ચોંકાવનારી ઘટના સામે આવી છે. નવસારીના ગણદેવીમાં ટ્રાન્સપોર્ટ ગોડાઉનમાં વહેલી સવારે ભીષણ આગ લાગવાથી ત્રણ લોકો આગમાં બળી મોતને ભેટ્યા છે. આ સિવાય અન્ય ત્રણ લોકો પણ ગંભીર રીતે ઈજાગ્રસ્ત થયા છે, તેમજ હજુ અનેક લોકો આગમાં ફસાયા હોવાની આશંકા વ્યક્ત કરવામાં આવી રહી છે.

આગની ઘટનાની જાણ થતા જ ફાયરની ટીમ તુરંત ઘટના સ્થળે પહોંચી આગ ઓલવવાનો પ્રયાસ કરી રહી છે. ગોડાઉનમાં જ્યારે ટ્રકમાંથી બેરલ ખાલી કરવામાં આવી રહ્યા હતાં, તયારે એકાએક તેમાં ભડકો થયો. આ ભડકો થતાની સાથે જ તેણે તુરંત આગનું વિકરાળ સ્વરૂપ ધારણ કરી લીધું. ભડકો થતાની સાથે જ ત્રણ લોકો આગની લપેટમાં આવતા ત્યાંને ત્યાં જ જીવતા ભૂંજાઈ ગયા છે તેમજ ત્રણ લોકો ગંભીર રીતે ઘાયલ થયા હોવાની માહિતી સામે આવી છે.

આગની ઘટા સામે આવતા જ તુરંત ફાયર વિભાગને બોલાવવામાં આવ્યું હતું, જો કે આગે વિકરાળ સ્વરૂપ ધારણ કરતા બીલીમોરા, ગણદેવી, નવસારી અને ચીખલી જેવા વિસ્તારોમાંથી પણ ફાયરની ટીમોને બોલાવવામાં આવી છે. ફાયરની ટીમ સમગ્ર આગ પર કાબૂ મેળવવાનો પ્રયાસ કરી રહી છે. સ્થાનિકોના જણાવ્યા અનુસાર હજુ ત્રણ મજૂર ગોડાઉનમાં ફસાયા હોવાની આશંકા છે.

પોલીસ પાસેથી મળતી માહિતી મુજબ ટ્રકમાંથી કેમિકલના બેરલ ખાલી કરતા અચાનક આગ લાગી હતી. નીચે પણ ઘણી જગ્યાએ કેમિકલ ઢોળાયું હોવાના કારણે આગે વિકરાળ સ્વરૂપ લીધુ હતું. હાલ આગ પર કાબૂ મેળવી ફસાયેલા લોકોને બચાવવાના પ્રયાસ કરવામાં આવી રહ્યા છે. મૃતદેહોને બહાર કાઢી તેમની ઓળખ કરવામાં આવી રહી છે અને ઈજાગ્રસ્તને તાત્કાલિક ધોરણે વલસાડની હોસ્પિટલે ખસેડવામાં આવ્યા છે.

જો આપને આ પોસ્ટ ગમી હોય તો શેર કરો...