ભાગીદારીમાં ધંધો કરવાનું કહી જુવાનપુરના આસામી તથા તેના પુત્ર-ભાઈએ કરી છેતરપિંડી

Author: નોબત સમાચાર

ભાગીદારીમાં ધંધો કરવાનું કહી જુવાનપુરના આસામી તથા તેના પુત્ર-ભાઈએ કરી છેતરપિંડી

બોટાદના આસામી પાસેથી રૂ.૮.૪૦ લાખ પડાવ્યાઃ

જામનગર તા. ૧૩: કલ્યાણપુરના જુવાનપુર ગામના એક આસામીએ પોતાની પાસે એક્સપ્લોસીવનું લાયસન્સ હોવાનું અને તે સામાન રાખવા માટે ખેતરમાં ગોડાઉન પણ હોવાનું જણાવી બોટાદના એક આસામીને ભાગીદારીમાં એક્સપ્લોસીવનો વ્યવસાય કરવા માટે પ્રેર્યા પછી એક વર્ષમાં રૂ.૮ લાખ ૪૦ હજાર પડાવી લેતા બોટાદના આસામીએ આ શખ્સ તથા તેના પુત્ર અને ભાઈ સામે પોલીસમાં ફરિયાદ નોંધાવી છે.

દેવભૂમિ દ્વારકા જિલ્લાના કલ્યાણપુર તાલુકાના જુવાનપુર ગામના માધાભાઈ મોહનભાઈ નકુમ નામના શખ્સ સાથે એકાદ વર્ષ પહેલાં બોટાદના પાળીયાદ રોડ પર રેવાનગરમાં રહેતા ચેતનભાઈ ડાયાભાઈ રાવલનો સંપર્ક થયો હતો.

આ વેળાએ ચેતનભાઈએ એક્સપ્લોસીવ અંગેનું જુવાનપરમાં કામ શરૂ કરવા માટે રસ દાખવતા એક્સપ્લોસીવનું લાયસન્સ ધરાવતા માધાભાઈ નકુમે પોતાની પાસે ખેતરમાં તે માટેનું ગોડાઉન પણ હોવાનું કહી માલસામાન માટે મૂડી ન હોવાનું જણાવતા તે લાયસન્સ રીન્યુ કરાવવા અને ગોડાઉનનો ઉપયોગ કરવા આપી ભાગીદારીમાં ધંધો કરવાનું નક્કી થયું હતું.

ત્યારપછી ચેતનભાઈ પાસેથી કટકે કટકે રૂ.૮ લાખ ૪૦ હજાર માધાભાઈ તથા તેના પુત્ર વિપુલ અને ભાઈ વિપુલભાઈ મોહનભાઈ નકુમે મેળવી લીધા પછી ઠેંગો બતાવતા ચેતનભાઈએ ત્રણેય શખ્સ સામે ગુન્હો નોંધી તપાસ હાથ ધરી છે.

જો આપને આ પોસ્ટ ગમી હોય તો શેર કરો...