ડ્રગ્સ સાથે ઝડપાયેલા બે આરોપીને સાડા ત્રણ વર્ષની કેદ

Author: નોબત સમાચાર

ડ્રગ્સ સાથે ઝડપાયેલા બે આરોપીને સાડા ત્રણ વર્ષની કેદ

રૂ.૧૦ હજારનો દંડ પણ ફટકારવામાં આવ્યોઃ

જામનગર તા. ૧૩: જામનગર-ખંભાળિયા રોડ પર દાતા ગામ પાસેથી બે વર્ષ પહેલાં પોલીસે ૧૭.૬૫૦ ગ્રામ એમડી ડ્રગ્સ સાથે એક શખ્સને પકડી પાડ્યા પછી મુંબઈના તેના સાગરિતની પણ ધરપકડ કરી હતી. આ કેસ ચાલી જતા અદાલતે બંને આરોપીને સાડા ત્રણ વર્ષની કેદ અને રૂ.૧૦ હજારનો દંડ ફટકાર્યાે છે.

જામનગર-ખંભાળિયા ધોરીમાર્ગ પર આવેલા દાતા ગામના પાટીયા પાસેથી ગઈ તા.ર૭-પ-ર૩ના દિને પોલીસે વોચ રાખી જામનગરના મોહસીન સતાર સાટી ઉર્ફે છોટુ નામના શખ્સને ૧૭.૬૫૦ ગ્રામ એમડી ડ્રગ્સ સાથે દબોચી લીધો હતો. આ શખ્સે તે ડ્રગ્સ મુંબઈના ફૈઝલ મહંમદઉમર મેમણ પાસેથી વેચાણ માટે લીધુ હોવાની કબૂલાત કરી હતી. પોલીસે છ કોથળીમાં રાખવામાં આવેલુ ડ્રગ્સ, રૂ.૨૨૧૦ રોકડા, એક મોબાઈલ સહિતનો મુદ્દામાલ કબજે કર્યાે હતો.

ત્યારપછી મોહસીન સતાર સાટી ઉર્ફે છોટુ તથા ફૈઝલ મહંમદઉમર મેમણ સામે એનડીપીએસ એક્ટ હેઠળ ગુન્હાની નોંધ કરવામાં આવી હતી. ઉપરોક્ત કેસ ખંભાળિયાની ખાસ અદાલતમાં ચાલવા પર આવતા અદાલતે સરકારી વકીલની દલીલો ધ્યાને લઈ બંને આરોપીને તક્સીરવાન ઠરાવી સાડા ત્રણ-ત્રણ વર્ષની સખત કેદની સજા અને રૂ.૧૦-૧૦ હજારનો દંડ ફટકાર્યાે છે.

જો આપને આ પોસ્ટ ગમી હોય તો શેર કરો...