આશ્રમ છોડીને જતાં રહેવાનું કહી મહિલાને અપાઈ ધમકીઃ સીસીટીવી કેમેરો તોડી નખાયો

Author: નોબત સમાચાર

આશ્રમ છોડીને જતાં રહેવાનું કહી મહિલાને અપાઈ ધમકીઃ સીસીટીવી કેમેરો તોડી નખાયો

ત્રણ શખ્સ સામે વિશ્વાસઘાત કરી ધમકીની ફરિયાદઃ

જામનગર તા.૧૮ : કાલાવડના નવાગામમાં એક આશ્રમમાં સેવાપૂજા કરતા મહિલાને રવિવારે સાંંજે જામનગરના એક મહિલાએ આશ્રમ છોડી દેવા માટે ધમકી આપી આશ્રમનો કેમેરો તોડી રૂ.૨૦ હજારનું નુકસાન કર્યાની ફરિયાદ કરવામાં આવી છે. જ્યારે ટ્રકના હપ્તા ભરવા માટે રૂ.૪ લાખ રોકડા અને રૂ.૭૦ હજારનંુ બાઈક પડાવી લઈ ત્રણ શખ્સે વિશ્વાસઘાત કર્યાની ફરિયાદ થઈ છે.

કાલાવડ તાલુકામાં આવેલા નવાગામ સ્થિત વિશ્વાસધામ આશ્રમમાં રહી ત્યાં સેવાપૂજા કરતા છાયાબેન કરશનદાસ મકવાણા (ઉ.વ.૩૦) નામના મહિલા રવિવારે સાંજે આશ્રમ પર હતા ત્યારે ધસી આવેલા જામનગરના સુમિતાબેન ગુરૂમુખદાસ દામા નામના મહિલાએ આશ્રમના બંધ દરવાજા પાસે ઉભા રહી બૂમો પાડવાનું શરૂ કર્યું હતું.

આ મહિલાએ આશ્રમમાં કેમ રહે છે, ત્યાં મારો હક્ક છે, જતી રહેજે નહીં તો સારાવાટ નહીં રહે તેમ કહી ધમકી આપવા ઉપરાંત આશ્રમના ભગત ભરતભાઈ રાઠોડનું નામ લઈ ગાળો ભાંડી ધમાલ મચાવી હતી અને મુખ્ય દરવાજા પાસે લગાવવામાં આવેલા સીસી ટીવી કેમેરાને તોડી રૂપિયા વીસેક હજારનું નુકસાન કર્યું હતું. છાયાબેને કાલાવડ ગ્રામ્ય પોલીસ મથકમાં ફરિયાદ નોંધાવી છે.

જામનગરમાં કાલાવડ નાકા વિસ્તારમાં રંગુનવાલા હોસ્પિટલ પાસે રહેતા મહંમદ અઝરૂદ્દીન યાસીન બુખારી પાસેથી થોડા સમય પહેલાં જીજે-૧૦-ડીજી ૪૯૬૭ નંબરનું બાઈક ગરીબ નવાઝ સોસાયટીમાં રહેતા આમીન હુસેન નોતીયાર તથા સમર્પણ સર્કલ પાસે રહેતા રામ નંદાણીયાએ બળજબરીથી પડાવી લીધુ હતું. તે ઉપરાંત જીજે-૧૦-ટીવી ૮૭૧૧ નંબર વાળા ટ્રકના હપ્તા ભરવા માટે રૂ.૪ લાખ મેળવી હપ્તા ભર્યા ન હતા. આ બાબતે વાત કર્યા પછી મહંમદ અઝરૂદ્દીને પૈસા તથા બાઈક પરત માંગતા રામ નંદાણીયા અને આમીને ધમકી આપી હતી. તે પછી અબ્દુલ ઉર્ફે વસીમ હુસેન નોતીયારે પણ ધમકી આપી બાઈક પાછુ માંગીશ તો પતાવી દઈશ તેવી દાટી મારી હતી. આમીનને તેની જાણ થતાં તેણે પણ વોટ્સએપ કોલ કરી ધમકી આપતા અઝરૂદ્દીને સિટી એ ડિવિઝન પોલીસ સ્ટેશનમાં આમીન, તેના ભાઈ વસીમ, રામ નંદાણીયા સામે ફરિયાદ કરી છે.

જો આપને આ પોસ્ટ ગમી હોય તો શેર કરો...