જામીનની શરતનો ભંગ કરનાર હત્યા પ્રયાસના આરોપીના જામીન થયા રદ્દ

Author: નોબત સમાચાર

જામીનની શરતનો ભંગ કરનાર હત્યા પ્રયાસના આરોપીના જામીન થયા રદ્દ

જેલહવાલે કરી દેવાનો અદાલતનો આદેશઃ

જામનગર તા.૧૮ : જામનગરના એક શખ્સને પૂર્વ પત્ની પર જીવલેણ હુમલાના કેસમાં અદાલતે ફરિયાદીની જુબાની ન થાય ત્યાં સુધી જિલ્લામાં ન આવવાની શરતે જામીન આપ્યા હતા. આરોપી દ્વારા જામીનની શરતનો ભંગ કરાતા અદાલતે તેના જામીન રદ્દ કરી જેલમાં ધકેલ્યો છે.

જામનગરના રેશ્માબેન અબાઅહેમદ ગફલા નામના મહિલા તથા તેમના ભાભી અને પુત્ર ગઈ તા.૧-૩-૨૪ના દિને જી.જી. હોસ્પિટલમાં સારવાર મેળવવા આવ્યા હતા. ત્યાંથી પરત ફરતી વખતે જેની સાથે છૂટાછેડા થયા હતા તે પૂર્વ પતિ ઈમરાન મળી જતા તેણે ડખ્ખો શરૂ કર્યાે હતો.

આ શખ્સે ગાળો ભાંડી રેશ્માબેન પર છરીથી હુમલો કરી ઈજા પહોંચાડી હતી. આ મહિલાને ફરીથી હોસ્પિટલમાં સારવાર લેવી પડી હતી. તેણીની ફરિયાદ પરથી પોલીસે હત્યા પ્રયાસ સહિતની કલમો હેઠળ ગુન્હો નોંધી આરોપી ઈમરાન આમદ દલની ધરપકડ કરી જેલહવાલે કર્યાે હતો.

આ આરોપીએ કરેલી જામીન અરજી અદાલતે જિલ્લા હદમાં ન પ્રવેશવાની શરતે મંજૂર કરી હતી. તે પછી ઈમરાન શરતનો ભંગ કરી જામનગરમાં આવ્યો હોવાની વિગત ઉપરોક્ત ફરિયાદના પગલે બહાર આવી હતી. તે જામીન રદ્દ કરાવવા રેશ્માબેને અદાલતમાં અરજી કરતા અદાલતે આરોપીના જામીન રદ્દ કર્યા છે અને જેલહવાલે કર્યાે છે. ફરિયાદી તરફથી વકીલ શ્યામ રાજદેવ, અલ્ફાઝ મુંદ્રા, ડીજીપી જમન ભંડેરી રોકાયા હતા.

જો આપને આ પોસ્ટ ગમી હોય તો શેર કરો...