નકલી આધારકાર્ડ બનાવીને સંસદમાં ઘુસવાનો પ્રયાસ કરતા ત્રણ યુવકો ઝડપાયા

Author: નોબત સમાચાર

નકલી આધારકાર્ડ બનાવીને સંસદમાં ઘુસવાનો પ્રયાસ કરતા ત્રણ યુવકો ઝડપાયા

સીઆઈએસએફ દ્વારા દબોચી લેવાયાઃ તપાસનો ધમધમાટ

નવી દિલ્હી તા. ૭: નકલી આધારકાર્ડ બનાવીને સંસદમાં ઘુસવાનો પ્રયાસ કરતા ત્રણ યુવકોની ધરપકડ કરીને ઉંડી તપાસ કરવામાં આવી રહી છે, અને કેન્દ્રીય તપાસ એજન્સીઓ સતર્ક થઈ ગઈ છે.

નકલી આધારકાર્ડ સાથે સંસદભવનમાં પ્રવેશવાનો પ્રયાસ કરવા બદલ ત્રણ લોકોની ધરપકડ કરવામાં આવી છે. સીઆઈએસએફના જવાનોએ ત્રણ લોકોની ધરપકડ કરી છે. જણાવવામાં આવી રહ્યું છે કે, ત્રણેય મજૂરો નકલી આધારકાર્ડ સાથે સંસદભવનમાં ઘૂસવાનો પ્રયાસ કરી રહ્યા હતાં. આ દરમિયાન સીઆઈએસએફ જવાનોની નજર તેમના પર પડી અને ત્રણેયની ધરપકડ કરવામાં આવી. એફઆઈઆર નોંધવામાં આવી છે અને ત્રણેયની હાલ પૂછપરછ ચાલુ છે.

સુત્રોના જણાવ્યા અનુસાર જે ત્રણ મજૂરોની ધરપકડ કરવામાં આવી છે તેમના નામ કાસિમ, શોએબ અને મોનિસ છે. આરોપીઓ વિરૃદ્ધ ગંભીર કલમો હેઠળ એફઆઈઆર નોંધવામાં આવી છે. આ ઘટના ૪ જૂને બપોરે ૧.૩૦ વાગ્યે સંસદ ભવનના ગેટ નંબર ૩ પર જણાવવામાં આવી રહી છે.

જ્યારે કામદારો સંસદ ભવનના પ્રવેશદ્વાર પર પહોંચ્યા ત્યારે સુરક્ષાકર્મીઓએ તેમનું આધારકાર્ડ માંગ્યું. આ પછી જ્યારે તેણે આધાર કાર્ડ જોયું તો તેને શંકા ગઈ. જે પછી તપાસ શરૃ થઈ હતી. આ પછી જાણવા મળ્યું કે તેમના આધારકાર્ડ નકલી હતા અને આ પછી તરત જ કામદારોને કસ્ટડીમાં લેવામાં આવ્યા હતાં.

સંસદભવનની સુરક્ષાની જવાબદારી સીઆરપીએફ અને દિલ્હી પોલીસને સોંપવામાં આવી છે. સંસદભવનની અંદર એમપી લોન્જનું નિર્માણ કાર્ય ચાલી રહ્યું છે અને આ હેતુ માટે ત્રણ મજૂરો કથિત રીતે અંદર જઈ રહ્યા હતાં. ત્રણેય આરોપીઓને શાહનવાઝ આલમ નામના કોન્ટ્રાકટરે રાખ્યા હતાં.

ઉલ્લેખનીય છે કે ગયા વર્ષે ૧૩ ડિસેમ્બરે સંસદની સુરક્ષામાં મોટી ખામી સર્જાઈ હતી. સંસદની કાર્યવાહી દરમિયાન, બે યુવાનો પ્રેક્ષક ગેલેરીમાંથી ડેસ્ક પર કૂદી પડ્યા હતાં અને રંગનો ધુમ્મસ પણ છોડ્યો હતો. જેના કારણે હોલમાં ધુમાડો થયો હતો. આ પછી સંસદની સુરક્ષા વધારી લેવામાં આવી છે.

આ લોકોને ત્યાં હાજર સાંસદો અને સુરક્ષા દળોએ પકડી લીધા હતાં. આ સિવાય અન્ય સહયોગીઓની પણ ધરપકડ કરવામાં આવી છે. ધરપકડ કરાયેલા આરોપીઓએ જણાવ્યું હતું કે તેમનો ઉદ્દેશ્ય મણિપુર હિંસા, બેરોજગારી અને ખેડૂતોની સમસ્યાઓ તરફ ધ્યાન દોરવાનો હતો. આ કેસમાં અત્યાર સુધીમાં ૬ લોકોની ધરપકડ કરવામાં આવી છે.

જો આપને આ પોસ્ટ ગમી હોય તો શેર કરો...