જામનગરમાં ગઈકાલે એક સ્કૂલ, ત્રણ ટ્યુશન કલાસ અને પાંચ રેસ્ટોરન્ટ ચકાસણી પછી સીલ

Author: નોબત સમાચાર

જામનગરમાં ગઈકાલે એક સ્કૂલ, ત્રણ ટ્યુશન કલાસ અને પાંચ રેસ્ટોરન્ટ ચકાસણી પછી સીલ

ફાયર સેફટી ચકાસણી સંદર્ભે કુલ ૧૯૧ મિલકતો સીલ કરાઈ

જામનગર તા. ૭: જામનગરમાં વધુ પ રેસ્ટોરન્ટ, ૧ શાળા અને ૩ ટયુશન કલાસને સીલ કરાયા છે. કુલ પ૮ ટ્યુશન કલાસ ૭ર શાળાઓ ૩૯ રેસ્ટોરન્ટ અને રર હોસ્પિટલ સહિત ૧૯૧ મિલકત સીલ થઈ.

રાજકોટ ગેમઝોન દુર્ઘટનાના પગલે સમગ્ર રાજ્યભરમાં હોટલ, રેસ્ટોરન્ટ-શાળા, કોલેજ, ટયુશન કલાસ સહિતના સંકુલોમાં ફાયર એનઓસી સહિતની ચકાસણી કરવામાં આવી રહી છે. જેને ધ્યાનમાં રાખીને જામનગર મહાનગરપાલિકાનું તંત્ર પણ દોડતું થયું છે, અને શહેરમાં જુદી જુદી આઠ ટીમો બનાવીને ચેકીંગ કામગીરી થઈ રહી છે, અને ફાયર એનઓસી તેમજ બાંધકામની મંજૂરી વગેરેની ચકાસણી કરવામાં આવી રહી છે.

ઉપરાંત હોટલ રેસ્ટોરન્ટને વગેરેને સીલ કરવામાં આવી રહ્યા છે, જે પૈકી ગઈકાલે વધુ પાંચ હોટલ રેસ્ટોરન્ટ, એક સ્કૂલ અને ત્રણ ટયુશન કલાસીસ સીલ કરવામાં આવ્યા છે.

જામનગર મહાનગરપાલિકાના મ્યુનિ. કમિશનર ડી.એન.મોદીના સીધા માર્ગદર્શન હેઠળની સિટી ઈજનેર ભાવેશ જાનીની રાહબરીમાં એક સપ્તાહથી આ કામગીરી કરવા આવી રહી છે, જેમાં ફાયર બ્રિગેડની ટીમ એસ્ટેટ શાખાની ટીમ તેમજ ટીપીઓ બ્રાન્ચની ટુકડી સર્વે કરી રહી છે. અત્યાર સુધીમાં કુલ ૩૯ રેસ્ટોરન્ટ, ૭ર સ્કૂલ, રર હોસ્પિટલ (પાર્ટલી) અને પ૮ ટયુશન કલાસ સીલ કરવામાં આવ્યા છે.

જો આપને આ પોસ્ટ ગમી હોય તો શેર કરો...