કાકા-ભત્રીજા વચ્ચે ધીંગાણું થતાં બે વ્યક્તિને થઈ ઈજાઃ સામસામી ફરિયાદ

Author: નોબત સમાચાર

કાકા-ભત્રીજા વચ્ચે ધીંગાણું થતાં બે વ્યક્તિને થઈ ઈજાઃ સામસામી ફરિયાદ

કોઈ બાબતે નદીપા રોડ પર થઈ મારામારીઃ

જામનગર તા. ૨૧: જામનગરના નદીપા વિસ્તારમાં ગઈકાલે રાત્રે કોઈ બાબતે આરબ જમાતના કાકા-ભત્રીજાઓ વચ્ચે બબાલ થઈ પડી હતી. કાકા પર ચાર શખ્સે છરી, ધોકા, પાઈપથી હુમલો કર્યાે હતો. જ્યારે એક યુવાન પર બે શખ્સ ઢીકાપાટુ, છરીથી તૂટી પડ્યા હતા. બંને પક્ષે સામસામી ફરિયાદ નોંધાવી છે. બે ઈજાગ્રસ્તને સારવાર માટે હોસ્પિટલમાં ખસેડવામાં આવ્યા છે.

જામનગરના કાલાવડ નાકા બહાર આવેલી મકવાણા સોસાયટીમાં રહેતા અમરબીન અબ્દુલરહેમાન મસ્કતી નામના પ્રૌઢ પર ગઈકાલે રાત્રે નદીપામાં દીવાનખાના ચોક પાસે તેના ભત્રીજા હુસેન અહેમદ, ઈબ્રાહીમ અહેમદ, રાહીલ અહેમદ તથા આરીફબીન અબ્દુલરહેમાન નામના ચાર શખ્સે પાઈપ, ધોકા, છરી વડે હુમલો કરી ગાળો ભાંડી જાનથી મારી નાખવાની ધમકી આપી હતી. હુસેને પાઈપ અને ઈબ્રાહીમે ધોકાથી ઘા ફટકાર્યા હતા. જ્યારે રાહીલે છરી હુલાવવાનો પ્રયાસ કરતા અમરબીને હાથ વચ્ચે નાખતા તેઓને ઈજા થઈ હતી. આરીફબીને ઢીકાપાટુથી માર માર્યાે હતો. ઈજાગ્રસ્તને સારવાર માટે જી.જી. હોસ્પિટલમાં ખસેડવામાં આવ્યા છે. જ્યાંથી તેઓએ મોડીરાત્રે પોલીસમાં ફરિયાદ નોંધાવી છે.

આ ફરિયાદની સામે જુનૈદ અબ્બાઅહમદ મસ્કતીએ વળતી ફરિયાદ નોંધાવી છે. જેમાં તેણે અમરબીન અબ્દુલરહેમાન મસ્કતી, રફીક અબ્દુલરહેમાન સામે રાવ કરી છે. ફરિયાદમાં જણાવાયા મુજબ અમરબીને છરીથી અને રફીકે ઢીકાપાટુથી હુમલો કરી માર માર્યાે હતો. પોલીસે બંને ફરિયાદ રજીસ્ટરે લઈ છએય શખ્સ સામે ગુન્હો નોંધ્યો છે.

જો આપને આ પોસ્ટ ગમી હોય તો શેર કરો...