જામનગરમાં નવા ૧૦૦ વૃક્ષનું વાવેતરઃ બે વર્ષ માટેની જતનની જવાબદારી લેવાઈ

Author: નોબત સમાચાર

જામનગરમાં નવા ૧૦૦ વૃક્ષનું વાવેતરઃ બે વર્ષ માટેની જતનની જવાબદારી લેવાઈ

નવાનગર નેચર કલબ દ્વારા આજે વિશ્વ પર્યાવરણ દિવસની ઉજવણી કરાઈઃ

આજે પ જૂન એટલે કે વિશ્વ પર્યાવરણ દિવસ. એક સ્વચ્છ પર્યાવરણમાં એક સ્વસ્થ મનુષ્યનો વિકાસ થાય છે. પર્યાવરણને સ્વચ્છ રાખવું આપણી પ્રાથમિક જવાબદારી છે. પર્યાવરણની સીધી અસર આપણા જીવન પર પડે છે, પરંતુ આજના સમયમાં ઝડપથી ભાગતા મનુષ્યએ પર્યાવરણને ખતરામાં મૂકી દીધું છે. દુનિયાને આ ખતરાથી માહિતગાર કરાવવા માટે તથા લોકોને પર્યાવરણ પ્રત્યે જાગૃત કરવાના ઉદ્દેશ્યથી દર વર્ષે પ જૂને વિશ્વ પર્યાવરણ દિવસની ઉજવણી કરવામાં આવે છે. જામનગરની નવાનગર નેચર કલબ સત્તર વર્ષથી પર્યાવરણ જાગૃતિ અભિયાન ચલાવે છે. સંસ્થા દ્વારા વર્ષ દરમ્યાન પર્યાવરણ સંરક્ષણ અને સંવર્ધનની અનેક પ્રવૃત્તિઓ કરવામાં આવે છે તેથી પ, જૂન ર૦ર૪ ના દિવસે પર્યાવરણ જાગૃતિ અંતર્ગત દર વર્ષે શહેરના વિવિધ સ્થળો પર વૃક્ષા રોપણ કરવામાં આવે છે, અને આ વૃક્ષોની બે વર્ષ સુધી કાળજી લેવામાં આવે છે. તે મુજબ આ વર્ષે જામનગર શહેરના વોર્ડ નં.૧૧ માં આવેલા કામધેનું રેસીડેન્સીના કોમન પ્લોટમાં તથા દરેડમાં આવેલ સિદ્ધેશ્વર મહાદેવ મંદિરમાં વૃક્ષા રોપણ કરવામાં આવ્યું હતું. જેમાં દેશી કુળના ૧૦૦ જેટલા વૃક્ષોનું વાવેતર કરવામાં આવ્યું હતું. જેનું સતત બે વર્ષ સુધી જતન કરવામાં આવશે.

જો આપને આ પોસ્ટ ગમી હોય તો શેર કરો...