પટનાથી એક જ ફ્લાઈટમાં નીતિશ કુમાર અને તેજસ્વી યાદવ દિલ્હી જવા નીકળતા ખળભળાટ

Author: નોબત સમાચાર

પટનાથી એક જ ફ્લાઈટમાં નીતિશ કુમાર અને તેજસ્વી યાદવ દિલ્હી જવા નીકળતા ખળભળાટ

આજે જ એનડીએ અને ઈન્ડિયા ગઠબંધનની બેઠકો છે ત્યારે

પટણા તા. પઃ આજે નવી દિલ્હીમાં એનડીએ અને ઈન્ડિયા ગઠબંધનની અલગ-અલગ સમયે બેઠકો યોજાનાર છે, ત્યારે પટણાથી નીતિશ કુમાર અને તેજસ્વી યાદવ એક જ ફ્લાઈટમાં દિલ્હી જવા નીકળતા અટકળોનું બજાર ગરમાયું છે, અને એક સસ્પેન્સ સર્જાયું છે.

બિહારના મુખ્યમંત્રી નીતિશ કુમાર અને રાષ્ટ્રીય જનતા દળના નેતા તેજસ્વી યાદવ પટનાથી એક જ ફ્લાઈટમાં દિલ્હી આવી રહ્યા છે. બન્ને પટનાથી નીકળ્યા પછી એક તસ્વીર સામે આવી છે, જેમાં નીતિશ અને તેજસ્વી બેઠે લા જોવા મળે છે.

આજે દિલ્હીમાં એનડીએ અને ઈન્ડિયા એલાયન્સ બન્નેની બેઠક યોજાવાની છે. આ સંદર્ભે બન્ને નેતાઓ દિલ્હી આવી રહ્યા છે. આરજેડી નેતા તેજસ્વી યાદવ પટનાથી દિલ્હી જવા રવાના થઈ ગયા છે.

પટના એરપોર્ટથી રવાના થતા પહેલા તેજસ્વી યાદવે કહ્યું, અમે ઈન્ડિયા બ્લોક સરકાર બનાવવાનો પ્રયાસ કરવા દિલ્હી જઈ રહ્યા છીએ, જ્યારે તેમને પૂછવામાં આવ્યું કે શું નીતિશ કુમાર પણ આ ફ્લાઈટમાં દિલ્હી જઈ રહ્યા છે તો તેમણે હસીને કહ્યું, 'મને ખબર નથી કે નીતિશ પણ આ ફ્લાઈટમાં દિલ્હી જઈ રહ્યા છે કે નહીં.'

તેજસ્વી યાદવના આ પ્રકારના સૂચક સ્મિત સાથેના નિવેદન પછી અટકળોનું બજાર ગરમાયું છે અને નીતિશ કુમાર ફરી પલટી મારી શકે છે, તેવી સંભાવનાઓ સાથે ઘેરૂ સસ્પેન્સ સર્જાયું છે.

ઉલ્લેખનિય છે કે, આજે દિલ્હીમાં એનડીએ અને ઈન્ડિયા ગઠબંધનની બેઠક છે. મુખ્યમંત્રી નીતિશ કુમાર અને વિપક્ષના નેતા તેજસ્વી યાદવ વિસ્તારા વિમાનમાં દિલ્હી જવા રવાના થયા. એટલું જ નહીં, નીતિશ કુમાર અને તેજસ્વી યાદવ ચૂંટણી પરિણામો પછી પહેલીવાર સાથે જોવા મળ્યા હતાં એ પણ એક જ ફ્લાઈટમાં હોવાથી ચર્ચાઓએ થઈ રહી છે.

નીતિશ કુમાર અને તેજસ્વી યાદવ એક જ વિમાનમાં સાથે દિલ્હી ગયા પછી દેશના રાજકારણમાં અનેક અટકળો શરૂ થઈ ગઈ છે. ગઈકાલે જે રીતે પરિણામો આવ્યા અને બહુમતીના આંકડા ઘણા ઓછા હતાં, તે પછી વિપક્ષો નીતિશ કુમાર પર પ્રહારો કરી રહ્યા છે અને તેમને નાયબ વડાપ્રધાન બનાવવાની ચર્ચાઓ થવા લાગી છે. આ અહેવાલોએ રાજકીય ક્ષેત્રે ખળભળાટ મચાવ્યો છે, અને અટકળોની જાણે આંધી ઊઠી રહી છે.

જો આપને આ પોસ્ટ ગમી હોય તો શેર કરો...