અગાઉ સાથે કામ કરતી યુવતીનો સંપર્ક ન થતાં એક શખ્સે ઠપકારી ધમકી

Author: નોબત સમાચાર

અગાઉ સાથે કામ કરતી યુવતીનો સંપર્ક ન થતાં એક શખ્સે ઠપકારી ધમકી

નાળુ સાફ કરવાના પ્રશ્ને વૃદ્ધ પર પિતા-પુત્રનો હુમલોઃ

જામનગર તા. ૧૫ઃ કાલાવડના રણુજામાં એક વૃદ્ધ ગઈકાલે વરસાદી પાણીનું નાળુ સાફ કરતા હતા ત્યારે ત્યાં ધસી આવેલા પિતા-પુત્રએ નાળુ સાફ કેમ કરશ તેમ કહી પથ્થરના છૂટા ઘા કરતા વૃદ્ધ ઘવાયા છે. જ્યારે સાથે અગાઉ કામ કરતી યુવતીનો સંપર્ક ન થઈ શકતા તે યુવતીના સંબંધી મહિલાના ઘેર જઈ મેઘપરના એક શખ્સે જાનથી મારી નાખવાની ધમકી આપી હોવાની પોલીસમાં રાવ કરાઈ છે.

કાલાવડ તાલુકાના રણુજા (દેવપુરા)માં રહેતા મોહનભાઈ નાનજીભાઈ ભંડેરી નામના સિત્તેર વર્ષના વૃદ્ધ ગઈકાલે સાંજે ગામના સીમ વિસ્તારમાં આવેલા વરસાદી પાણીના નિકાલનું નાળુ સાફ કરતા હતા.

આ વેળાએ ત્યાં ધસી આવેલા જીવરાજ કરમશીભાઈ સખીયા તથા તેના પુત્ર ધર્મેશ સખીયાએ ગાળો ભાંડ્યા પછી ત્યાં પડેલા પથ્થર ઉપાડી ઘા કરતા મોહનભાઈને માથામાં પથ્થર વાગી ગયો હતો. લોહીલુહાણ બની ગયેલા મોહનભાઈને માથામાં ટાંકા આવ્યા છે. પિતા-પુત્રએ નાળુ સાફ કરવા આવીશ તો પતાવી દઈશું તેવી ધમકી પણ આપી હતી. મોહનભાઈએ કાલાવડ શહેર પોલીસ સ્ટેશનમાં ફરિયાદ કરી છે.

જામનગરના ગોકુલનગર વિસ્તારમાં રહેતા એક મહિલાના ભત્રીજી થોડા વખત પહેલા ખંભાળિયા ધોરીમાર્ગ પર આવેલા રિલાયન્સ મોલમાં નોકરી કરતા હતા. ત્યાં મેઘપર ગામનો શક્તિસિંહ રાઠોડ નામનો શખ્સ પરિચયમાં આવ્યો હતો. તે પછી શક્તિસિંહ આ યુવતીને પજવતો હતો. તે પછી આ મહિલાના ભત્રીજીએ નોકરી મૂકી દીધી હતી. તેથી શક્તિસિંહ તેને મળી શકતો ન હતો. તે યુવતીનો સંપર્ક ન થઈ શકતા ઉશ્કેરાયેલા આ શખ્સે ગઈકાલે બપોરે તે મહિલાના ઘેર આવી તેણીને જાનથી મારી નાખવાની ધમકી આપતા સિટી સી ડિવિઝન પોલીસ સ્ટેશનમાં ફરિયાદ કરાઈ છે.

જો આપને આ પોસ્ટ ગમી હોય તો શેર કરો...