નાગેશ્વરમાં પોલીસે ઓફિસને તાળું મરાવી ચાવી લઈ લીધાનો કરાયો આક્ષેપઃ કોળી સમાજ ખફા

Author: નોબત સમાચાર

નાગેશ્વરમાં પોલીસે ઓફિસને તાળું મરાવી ચાવી લઈ લીધાનો કરાયો આક્ષેપઃ કોળી સમાજ ખફા

પ્રમુખને ચાવી લઈ જવા કહેવાયું હોવાની સમાજના એક વ્યક્તિએ વીડિયો બાઈટ આપીઃ

જામનગર તા. ર૮: જામનગરના નાગેશ્વર વિસ્તારમાં આવેલી કોળી સમાજની ઓફિસે ગઈરાત્રે પહોંચેલી પોલીસ ટીમે સમાજના પ્રમુખ અંગે પૂછપરછ કર્યા પછી ઓફિસને તાળુ મરાવી ચાવી લઈ લીધાનો આક્ષેપ કરવામાં આવ્યો છે. આ મુદ્દો ટોક ઓફ ધ ટાઉન બન્યો છે. રાત્રે નાગેશ્વરમાં કોળી સમાજના સંખ્યાબંધ લોકો ઉમટી પડ્યા હતા.

જામનગરના નાગેશ્વર વિસ્તારમાં આવેલા ચામુંડા માતાજીના મંદિર પાસે આવેલી સમસ્ત તળપદા કોળી સમાજની જગ્યામાં ગઈરાત્રે પોલીસ કર્મચારીઓ આવી પહોંચ્યા હતા. તેઓએ સમાજના પ્રમુખ અંગે પૂછપરછ કર્યા પછી સમાજની ઓફિસને તાળું મરાવી દઈ તેની ચાવી લઈ લીધાનો અને પ્રમુખને પોલીસ મથકે મોકલી ચાવી લઈ જવાની સુચના આપી હોવાનો આક્ષેપ કરાયો છે.

વધુ વિગત મુજબ થોડા દિવસ પહેલા એક વિપ્ર યુવાને હવન કરવાની બાબતે પોતાને માર મારવામાં આવ્યો હોવાની પોલીસમાં ફરિયાદ કરી હતી. તે ફરિયાદના અનુસંધાને સંભવિતઃ રીતે તપાસ માટે આવેલી પોલીસ ટીમે પ્રમુખ અંગે પૂછપરછ કર્યા પછી બળજબરી કર્યાની ચર્ચા ઉઠી છે. આ બાબતે કોળી સમાજના એક વ્યક્તિ દ્વારા વીડિયો બાઈટ આપવામાં આવી છે.

તેમાં જણાવવામાં આવ્યા મુજબ દરિયાકાંઠે આવેલા કોળી સમાજના મહાકાળી મંદિરે થોડા દિવસ પહેલા બલી ચઢાવવામાં આવી હોવાની વિગત મળતા કોળી સમાજના કેટલાક લોકો ત્યાં પહોંચી ગયા હતા. ત્યાં તાંત્રિકવિધિ કરવામાં આવી હોવાની શંકા પરથી એક વ્યક્તિની પૂછપરછ કરાઈ હતી. જેમાં આ વ્યક્તિએ હવે પોતે તાંત્રિકવિધિ નહીં કરે તેવો કબૂલાત આપતો વીડિયો પણ તે વ્યક્તિઓને ઉતારી આપ્યો હતો અને જે તે વખતે મામલો પૂર્ણ થયો હતો. ત્યાર પછી ગઈકાલે પોલીસ કર્મચારીઓ નાગેશ્વરમાં આવ્યા હતા અને સમાજની ઓફિસ જઈ ઓફિસની ચાવી લઈ ગયા હતા તેમ આ વ્યક્તિએ વીડિયોમાં જણાવ્યું છે.

વધુમાં જાણવા મળ્યા મુજબ આ સ્થળે વર્ષાેથી ગરબીનું આયોજન કરવામાં આવે છે જેમાં ૨૦૦થી વધુ બાળાઓ ભાગ લે છે તેના ફોર્મ ભરવા માટેની પ્રક્રિયા ગઈકાલે રાત્રે કરવામાં આવી રહી હતી ત્યારે પોલીસ ટીમ આવી પહોંચી હતી અને આ બબાલ સર્જાઈ હતી. ઉપરોક્ત બાબતે રાત્રે કોળી સમાજના લોકો નાગેશ્વર વિસ્તારમાં મોટી સંખ્યામાં ઉમટી પડ્યા હતા.

જો આપને આ પોસ્ટ ગમી હોય તો શેર કરો...