ધ્રાંગડા ગામના પાટિયા પાસે મોટરમાં લઈ જવાતી દારૂની ૨૪ બોટલ કબજે

Author: નોબત સમાચાર

ધ્રાંગડા ગામના પાટિયા પાસે મોટરમાં લઈ જવાતી દારૂની ૨૪ બોટલ કબજે

દિગ્વિજય પ્લોટમાં મકાનમાંથી પાંચ બોટલ મળી આવીઃ

જામનગર તા. ૧૭ઃ ધ્રોલના ધ્રાંગડા ગામના પાટિયા પાસે મોટરમાં દારૂની કરાતી હેરફેર એલસીબીએ પકડી પાડી છે. મોટરમાંથી દારૂની ૨૪ બોટલ કબજે કરાઈ છે. પકડાયેલા આરોપીએ અમદાવાદથી એક મહિલાએ દારૂ મોકલ્યાની કબૂલાત આપી છે. જ્યારે દિગ્વિજય પ્લોટમાં એક મકાનમાંથી પાંચ બોટલ મળી આવી છે.

ધ્રોલ નજીકના ધ્રાંગડા ગામના પાટિયા પાસે ગઈકાલે મોટરમાં દારૂની હેરાફેરી થઈ રહી હોવાની બાતમી એલસીબીના હરદીપ બારડ, મયુરસિંહ, ઋષીરાજસિંહ વાળાને મળતા ઈન્ચાર્જ પીઆઈ બી.એન. ચૌધરીને વાકેફ કરાયા પછી પીએસઆઈ આર.કે. કરમટા, પી.એન. મોરીના વડપણ હેઠળ વોચ ગોઠવાઈ હતી.

તે દરમિયાન ધ્રાંગડા પાટિયા પાસેથી જીજે-૧-આરકે ૮૧૫ નંબરની મોટર પસાર થતાં તેને રોકાવી એલસીબીએ તલાશી લેતા મોટરમાંથી દારૂની ૨૪ બોટલ મળી આવી હતી. આ જથ્થા સાથે જામનગર તાલુકાના મોરાર સાહેબના ખંભાલીડા ગામનો જીતેન્દ્રસિંહ જુવાનસિંહ જાડેજા ઉર્ફે જેજે નામનો શખ્સ મળી આવ્યો હતો. તેની અટકાયત કરી પૂછપરછ કરાતા તેણે આ જથ્થો અમદાવાદના દિપ્તીબેન ઉર્ફે દક્ષા ગોસ્વામીએ મોકલાવ્યો હોવાની કબૂલાત કરી છે. એલસીબીએ દારૂ, અઢી લાખની મોટર કબજે કરી બંને સામે ધ્રોલ પોલીસ સ્ટેશનમાં ગુન્હો રજીસ્ટર કરાવ્યો છે.

જામનગરના દિગ્વિજય પ્લોટ વિસ્તારની શેરી નં.૫૦માં આવેલા મંદિર નજીકના રાજ દીપકભાઈ ભદ્રા નામના શખ્સના મકાનમાં ગઈકાલે સાંજે સિટી-એ ડિવિઝનના સર્વેલન્સ સ્ટાફે બાતમીના આધારે દરોડો પાડતા તે મકાનમાંથી દારૂની પાંચ બોટલ સાંપડી છે. દરોડા પહેલાં આરોપી નાસી ગયો છે.

જામનગરના રણજીત સાગર રોડ પર હર્ષદ મીલની ચાલી પાસેથી ગઈકાલે સાંજે સિટી-એ ડિવિઝનના સર્વેલન્સ સ્ટાફે વિજય પ્રાગજીભાઈ વાઘેલા નામના શખ્સને દારૂની બોટલ સાથે પકડી પાડ્યો છે.

જો આપને આ પોસ્ટ ગમી હોય તો શેર કરો...