કાશ્મીરના કુલગામમાં સુરક્ષા દળોએ પાંચ આતંકવાદીઓને ફૂંકી માર્યાઃ બે જવાન ઘાયલ

Author: નોબત સમાચાર

કાશ્મીરના કુલગામમાં સુરક્ષા દળોએ પાંચ આતંકવાદીઓને ફૂંકી માર્યાઃ બે જવાન ઘાયલ

શંકાસ્પદ ગતિવિધિઓ પછી ગોળીબાર થતા સંયુક્ત ઓપરેશન

શ્રીનગર તા. ૧૯: કાશ્મીરના કુલગામમાં સુરક્ષા દળોનું મોટું ઓપરેશન સફળ રહ્યું છે, જેમાં પાંચ આતંકી ઠાર થયા છે, જો કે બે જવાનો ઘાયલ થયા છે.

જમ્મુ-કાશ્મીરના કુલગામમાં આતંકવાદીઓ અને સુરક્ષાદળો વચ્ચે અથડામણ થઈ છે. કુલગામ જિલ્લાના બેહીબાગ પીએસના કદ્દર ગામમાં એન્કાઉન્ટર ચાલી રહ્યું છે. બન્ને તરફથી ભારે ગોળીબાર થઈ રહ્યો છે. કહેવામાં આવી રહ્યું છે કે સુરક્ષા દળોએ પ આતંકીઓને ઠાર કર્યા છે.

જો કે, બે જવાનો પણ ઘાયલ થયા છે. એન્કાઉન્ટર પછી સુરક્ષાદળોની ટીમ વિસ્તારમાં સર્ચ ઓપરેશન ચલાવી રહી છે. આતંકવાદીઓ અને સુરક્ષા દળો વચ્ચે આ અથડામણ કુલગામ જિલ્લાના બેહીબાગ પીએસના કદ્દેર ગામમાં થઈ હતી.

આ માહિતી આપતા આર્મીના ચિનાર કોર્પ્સે કહ્યું કે આતંકવાદીઓની હાજરી વિશે વિશેષ ગુપ્ત માહિતીના આધારે ભારતીય સેનાએ કુલગામમાં સંયુક્ત ઓપરેશન શરૂ કર્યું. સૈનિકોએ શંકાસ્પદ ગતિવિધિઓ જોઈ, આતંકવાદીઓએ અંધાધૂંધ ગોળીબાર કર્યો હતો. જેના જવાબમાં સૈનિકોએ અસરકારક જવાબ આપ્યો હતો.

ઉલ્લેખનિય છે કે, છેલ્લા કેટલાક દિવસોમાં જમ્મુ-કાશ્મીરમાં આતંકવાદી ઘટનાઓ સામે આવી હતી, જે પછી સુરક્ષા દળોએ ઘાટીમાં આતંકવાદ વિરોધી અભિયાનને તેજ કરી દીધું છે. બે મહિના પહેલા ર૮ ઓક્ટોબરે જમુના અખનૂર વિસ્તારમાં સુરક્ષા દળોએ ત્રણ આતંકીઓને ઠાર કર્યા હતાં. ત્યારપછી આતંકીઓએ સેનાના કાફલા પર હુમલો કર્યો હતો. ત્યારપછી સુરક્ષા દળોએ આ વિસ્તારમાં ઓપરેશન શરૂ કર્યું હતું.

આ ઓપરેશન દરમિયાન ત્રણ આતંકીઓ માર્યા ગયા હતાં. માર્યા ગયેલા આતંકવાદીઓ પાસેથી હથિયારો અને દારૂગોળો મળી આવ્યો હતો. અધિકારીઓએ જણાવ્યું હતું કે, જ્યારે આર્મી એમ્બ્યુલન્સ ગામમાંથી પસાર થઈ હતી ત્યારે ગામમાં કેટલીક ગોળીઓનો અવાજ સંભળાયો હતો. જે સેનાના વાહન પર ગોળીબાર કરવામાં આવ્યો હતો. આ પછી સૈન્યના જવાનોએ પોલીસ સાથે મળીને ગામ અને આસપાસના વિસ્તારોને ઘેરી લીધા હતાં અને સરહદ પારથી ઘૂસણખોરી કરી રહેલા આતંકવાદીઓને શોધવા અને તેને બેઅસર કરવા માટે ઓપરેશન હાથ ધર્યું હતું, જેમાં ત્રણ આતંકવાદીઓ માર્યા ગયા હતાં.

જો આપને આ પોસ્ટ ગમી હોય તો શેર કરો...