કરશનપરની સીમમાં કુદરતી હાજતે ગયેલા યુવાનનું નદીમાં ખાબકી જવાથી થયું મૃત્યુ

Author: નોબત સમાચાર

કરશનપરની સીમમાં કુદરતી હાજતે ગયેલા યુવાનનું નદીમાં ખાબકી જવાથી થયું મૃત્યુ

દુકાનનું શટર બંધ કરતી વખતે વેપારી બેભાનઃ મોતઃ

જામનગર તા. ૧૮: જામજોધપુર તાલુકાના કરશનપર ગામના એક યુવાન ગઈકાલે સવારે ગામમાંથી વહેતી નદી પાસે કુદરતી હાજત માટે ગયા પછી કોઈ રીતે નદીમાં લપસી પડતા મોતને શરણ થયા છે. જ્યારે સુરજકરાડીમાં દુકાનનું શટર બંધ કરતી વખતે બેભાન બની ગયેલા વેપારી પર કાળનો પંજો પડ્યો છે.

જામજોધપુર તાલુકાના કરશનપર ગામના બાબુભાઈ નારણભાઈ સરસીયા નામના વીસ વર્ષના યુવાન ગઈકાલે સવારે પોતાના ઘરેથી કુદરતી હાજત માટે નીકળ્યા હતા. તેઓ જ્યારે નજીકમાં આવેલી નદી પાસે પહોંચ્યા ત્યારે અકસ્માતે નદીમાં ખાબકી ગયા હતા. આ યુવાનનું ડૂબી જવાથી મૃત્યુ નિપજ્યું છે. હમીરભાઈ ભીખાભાઈ સરસીયાએ પોલીસને જાણ કરી છે.

દ્વારકા તાલુકાના આરંભડા ગામની સીમમાં મહાવીર સોસાયટીમાં રહેતા પરેશભાઈ નરોત્તમભાઈ સામાણી નામના ચુમાલીસ વર્ષના યુવાન સોમવારે રાત્રે નવેક વાગ્યે સુરજકરાડીમાં નગરપાલિકા કચેરી હતા ત્યારે પોતાની કુંજ મોબાઈલ નામની દુકાન વધાવતા હતા ત્યારે શટર ખેંચતી વખતે કોઈ રીતે બેભાન બની ગયા હતા. સારવારમાં ખસેડાયેલા પરેશભાઈનું મૃત્યુ નિપજ્યું છે. તેમના પુત્ર કુંજભાઈ સામાણીએ પોલીસને જાણ કરી છે.

જો આપને આ પોસ્ટ ગમી હોય તો શેર કરો...