જામનગરમાં ૧૦૮ ની ટીમ, આરટીઓ દ્વારા અકસ્માતના હતભાગીને અપાઈ શ્રદ્ધાંજલિ

Author: નોબત સમાચાર

જામનગરમાં ૧૦૮ ની ટીમ, આરટીઓ દ્વારા અકસ્માતના હતભાગીને અપાઈ શ્રદ્ધાંજલિ

નવેમ્બરના ત્રીજા રવિવારે દર વર્ષે દુનિયાભરમાં મનાવાય છે વર્લ્ડ રિમેમ્બર ડેઃ સામૂહિક પ્રતિજ્ઞા લેવડાવાઈ

જામનગરમાં ૧૭ નવેમ્બરે રવિવારના દિવસે શહેરની ટ્રાફિક શાખા, આરટીઓ કચેરી અને ૧૦૮ ની ટીમ દ્વારા સંયુક્ત રીતે 'વર્લ્ડ રિમેમ્બર ડે'ની ઉજવણી કરવામાં આવી હતી અને અકસ્માતના મૃત્યુ પામેલા તમામ હતભાગીઓને શ્રદ્ધાંજલિ પાઠવવામાં આવી હતી. સમગ્ર વિશ્વમાં નવેમ્બર માસના ત્રીજા રવિવારે વર્લ્ડ રિમેમ્બર ડે ની ઉજવણી કરાય છે, અને માર્ગ અકસ્માતમાં મૃત્યુ પામેલા નાગરિકોને શ્રદ્ધાંજલિ અપાય છે. જેના ભાગરૂપે જામનગર શહેરમાં મહાનગરપાલિકાની કચેરીના કમ્પાઉન્ડમાં ૧૦૮ ની ટીમના પ્રોગ્રામ ઓફિસર મણવીર ડાંગરની ઉપસ્થિતિમાં આ કાર્યક્રમ યોજાયો હતો, જેમાં ટ્રાફિક શાખા અને આરટીઓ કચેરીની ટીમ પણ જોડાઈ હતી. ૧૦૮ ના પ્રોગ્રામ ઓફિસર મણવીર ડાંગર તેમજ આરટીઓના આસી. ઈન્સ્પેક્ટર શુભમ્ રૂપાણી અને પૃથ્વી કવાયા, ઉપરાંત ઈમરજન્સી મેનેજમેન્ટના એક્ઝિક્યુટીવ કિશન વાઢેર ઉપરાંત ટ્રાફિક શાખાનો સ્ટાફ વગેરે જોડાયા હતાં, અને તમામ મૃતકોને શ્રદ્ધાંજલિ પાઠવાઈ હતી. આ ઉપરાંત માર્ગ અકસ્માતના બનાવમાં ઈજાગ્રસ્ત બનેલી વ્યક્તિ વગેરેને તાત્કાલિક અસરથી સારવારની જરૂરત હોય તેવા સંજોગોમાં તુરત જ ૧૦૮ ની ટીમ વગેરેને જાણ કરવા અને લોકોને મદદ કરવા માટે ઉપરાંત લોકજાગૃતિ અર્થે નગરજનોને પ્રતિજ્ઞા લેવડાવી હતી.

જો આપને આ પોસ્ટ ગમી હોય તો શેર કરો...