જામનગરમાં શ્રી દ્વારકાધીશ મંદિરે ૧૯ જાન્યુ.ના છપ્પન ભોગ મહોત્સવ

Author: નોબત સમાચાર

જામનગરમાં શ્રી દ્વારકાધીશ મંદિરે ૧૯ જાન્યુ.ના છપ્પન ભોગ મહોત્સવ

સમગ્ર હાલારના વૈષ્ણવો માટે આનંદનો અવસરઃ

જામનગર તા. ૧૦: છોટીકાશી જામનગરમાં ખંભાળિયા ગેઈટ નજીક આવેલ તથા શ્રી મોટી હવેલી ટ્રસ્ટ સંચાલિત શ્રી દ્વારકાધીશના પ્રાચીન મંદિરમાં તા. ૧૯-૧-ર૦રપ ને પોષ વદ પાંચમ ને રવિવારે સાંજે ૪ થી ૯ દરમિયાન બડા મનોરથ-છપ્પન ભોગ મહોત્સવનું આયોજન કરવામાં આવ્યું છે.

શ્રી પુષ્ટી સંપ્રદાય મોટી હવેલી ટ્રસ્ટ સંચાલિત શ્રી દ્વારકાપુરી મંદિરમાં પુષ્ટિ સિદ્ધાંત સંરક્ષણ શિરોમણી તથા શ્રી મોટી હવેલીના ગાદિપતિ પૂ.પા.ગો.શ્રી ૧૦૮ હરિરાયજી મહારાજની આજ્ઞા અને આશીર્વાદથી તથા પૂ.પા.ગો.શ્રી ૧૦૮ વલ્લભરાયજી મહોદયના માર્ગદર્શન હેઠળ મુખ્યાજી રમેશભાઈ દ્વારા પ્રથમ વખત દ્વારકાપુરી મંદિરમાં બડા મનોરથ-છપ્પન ભોગ મહોત્સવનું આયોજન કરવામાં આવ્યું છે.

તા. ૧૯/૧ ને રવિવારે સાંજે ૪ થી ૯ દરમિયાન વૈષ્ણવોને છપ્પન ભોગના દર્શનનો લાભ મળશે. મહોત્સવમાં મોટી હવેલીના પૂ.પા.ગો.શ્રી વલ્લભરાયજી મહોદયનું સાંનિધ્ય તથા દર્શનનો લાભ મળશે. તેમજ શ્રી આણદાબાવા સેવા સંસ્થાના મહંત દેવપ્રસાદજીની પણ પ્રેરક ઉપસ્થિત રહેશે.

આ મહોત્સવને અનુલક્ષીને તા. ૧૭/૧ ને શુક્રવારે સવારે નૂતન ધ્વજારોહણ તથા સાંજે વિવાહ ખેલ મનોરથ અને તા. ૧૮/૧ ને શનિવારે બપોરે પણ નૂતન ધ્વજારોહણ મનોરથ યોજાશે.

છપ્પન ભોગ મહોત્સવમાં વિવિધ જનપ્રતિનિધિઓ અર્થાત્ સત્તાધીશો સહિતના નેતાઓ તેમજ વિવિધ સમાજના અગ્રણીઓ અને શ્રેષ્ઠીઓ અતિથિ થશે અને પુષ્ટિ સંપ્રદાયના આ અનેરા ઉત્સવનો પુણ્યલાભ પ્રાપ્ત કરશે.

છપ્પન ભોગ મહોત્સવ દરમિયાન પાર્કિંગની વ્યવસ્થા શ્રી રામબાગ, ભાટિયા મહાજન વાડી, ખંભાળિયા ગેઈટ પાસે રાખવામાં આવી છે. વડીલ વૈષ્ણવો માટે દર્શનની વિશેષ વ્યવસ્થા પણ કરવામાં આવી છે.

છપ્પન ભોગ મહોત્સવના આલૌકિક દર્શનનો લાભ લેવા સમગ્ર હાલારના વૈષ્ણવોને મુખ્યાજી રમેશભાઈ તથા છપ્પન ભોગ મહોત્સવ સહિતિ દ્વારા આમંત્રણ પાઠવવામાં આવે છે. વધુ માહિતી માટે મુખ્યાજી રમેશભાઈ (મો. ૯૪ર૯પ પ૭૦૪પ) પર સંપર્ક સાધવો.

જો આપને આ પોસ્ટ ગમી હોય તો શેર કરો...