શાંતિનગરમાં બાઈક આપવાનું કહી શખ્સે છરીથી કર્યાે હુમલો

Author: નોબત સમાચાર

શાંતિનગરમાં બાઈક આપવાનું કહી શખ્સે છરીથી કર્યાે હુમલો

મોટર સાઈડમાં મુકવાનું કહેતા પિતા-પુત્રીને માર પડ્યોઃ

જામનગર તા. ૧૩: જામનગરના શાંતિનગર વિસ્તારમાં ગઈકાલે એક કુખ્યાત શખ્સે છરીથી બે યુવાન પર હુમલો કર્યાે હતો. જયારે મોટર સાઈડમાં રાખવાનું કહેતા પિતા-પુત્રી પર એક મહિલા સહિત ચારે હુમલો કરી માર માર્યાે હતો. ઈલેકટ્રીક કામના કોન્ટ્રાક્ટ બાબતે નગરના યુવાનને જોડિયામાં ફડાકા ઝીંકવામાં આવ્યા હતા.

જામનગરના ગાંધીનગર વિસ્તાર નજીકના મોમાઈનગર સ્થિત મોમાઈ એપાર્ટમેન્ટમાં રહેતા પૃથ્વીરાજસિંહ યોગેન્દ્રસિંહ ગોહિલ તથા તેમના મિત્ર કુલદીપસિંહ જાડેજા ગઈકાલે બપોરે પટેલ કોલોનીના છેવાડે શાંતિનગર વિસ્તારમાંથી બાઈક પર જતાં હતા ત્યારે દિવ્યરાજસિંહ ઉર્ફે દીવલો ડોન નામનો શખ્સ રોડ વચ્ચે ઉભો રહી ગયો હતો.

આ શખ્સે પૃથ્વીરાજસિંહને તેનું બાઈક આપવા કહ્યું હતું પરંતુ મારે કામ છે તેમ કહેતા દીવલા ડોને ઉશ્કેરાઈને ગાળો ભાંડ્યા પછી છરી કાઢી હતી અને હુમલો કર્યાે હતો. તેનો ઘા ચૂકાવવા જતાં પૃથ્વીરાજને હાથની આંગળીઓમાં ઈજા થઈ હતી. વચ્ચે પડેલા પુષ્પરાજસિંહ ભગીરથસિંહ જાડેજાને પણ હાથની આંગળીમાં છરીનો છરકો મારી દીવલા ડોને ધમકી આપી હતી. સિટી બી ડિવિઝન પોલીસ સ્ટેશનમાં પૃથ્વીરાજસિંહે ફરિયાદ નોંધાવી છે.

જામનગરના ગોકુલનગર નજીક મયુર એવન્યુમાં રહેતા માવજીભાઈ વેલજીભાઈ સોનગરા અને તેની પુત્રી ગઈ તા.૯ની રાત્રે ઈકો મોટરમાં જતા હતા ત્યારે મથુરાનગરમાં રોડ પર બે મોટર પડી હતી. તેથી માવજીભાઈએ મોટર સાઈડમાં લેવાનું કહેતા વિક્રમસિંહ, દિગપાલસિંહ, રાહુલ, ગીતાબાને ઢીકાપાટુથી હુમલો કરી ધમકી આપ્યાની ફરિયાદ પોલીસમાં કરાઈ છે.

જોડિયાના મૂળ વતની અને હાલમાં જામનગરમાં પંચવટી ગૌશાળા પાસે રહેતા ઈમરાન સીદીકભાઈ સમેજાએ પોતાના મકાનનો ઈલેકટ્રીક કામનો કોન્ટ્રાક્ટ જોડિયાના મહંમદ હનીફ ગંઢ ઉર્ફે અબુબકરને આપ્યો હતો. તે પછી મહંમદે નકકી કરેલી રકમ કરતા વધુ રકમ મેળવ્યા પછી પણ વધારાની રકમ માંગતા ઈમરાન સમેજાએ તે રકમ આપવાની ના પાડી હતી. તેનો ખાર રાખી ગઈકાલે બપોરે જોડિયામાં બસ સ્ટેન્ડ રોડ પર રોકી મહંમદે બોલાચાલી કર્યા પછી ગાળો ભાંડી બે ફડાકા ઝીંકી દેતા ઈમરાન સમેજાએ જોડિયા પોલીસમાં ફરિયાદ કરી છે.

જો આપને આ પોસ્ટ ગમી હોય તો શેર કરો...