ગુજરાતમાં કાળઝાળ ગરમી વચ્ચે પવન સાથે વરસાદની હવામાન ખાતાની આગાહી

Author: નોબત સમાચાર

ગુજરાતમાં કાળઝાળ ગરમી વચ્ચે પવન સાથે વરસાદની હવામાન ખાતાની આગાહી

વરસાદી માહોલથી ગરમીમાં રાહત પણ ખેડૂતોને ચિન્તા

અમદાવાદ તા. ૧૩: હવામાન વિભાગની આગાહી કરી છે દક્ષિણ ગુજરાત, સૌરાષ્ટ્ર-કચ્છમાં વરસાદ થવાની સંભાવના સાથે વરસાદી સિસ્ટમ સક્રિય થતા તાપમાન ઘટ્યું છે, જેથી લોકોને રાહત મળી છે, જ્યારે ખેડૂતોને ચિન્તા વધી છે.

ગુજરાત સહિત સમગ્ર રાજ્યમાં ગરમીએ જોર પકડયું છે, તો બીજી તરફ હવામાન વિભાગ દ્વારા ભારે પવન સાથે વરસાદી આગાહી કરાઈ છે. આજે આણંદ, દાહોદ, વડોદરામાં વરસાદની આગાહી કરાઈ છે. આવતીકાલે વલસાડ, ભાવનગર અને સોમનાથ પણ વરસાદની આગાહી કરવામાં આવી છે, બીજી તરફ રાજ્યમાં ર શહેરોનું તાપમાન ૪૦ ડિગ્રીથી વધુ નોંધાયું છે.

રાજ્યમાં છેલ્લા ર૪ કલાકના તાપમાન મુજબ વાત કરીએ તો ર શહેરોનું તાપમાન ૪૦ ડિગ્રીને પાર પહોચ્યું છે. સૌથી વધુ તાપમાન વલ્લભવિદ્યાનગરમાં ૪૦.૩ ડિગ્રી નોંધાયું છે, અમદાવાદ ૩૮.૪ ડિગ્રી, ગાંધીનગર ૩૮.૦ ડિગ્રી, વડોદરા ૩૭.૪ ડિગ્રી, સુરત ૩પ.૦ ડિગ્રી, ભૂજ ૩૯.૪ ડિગ્રી, કંડલા ૩૭.૧ ડિગ્રી, ભાવનગર ૩૭.ર ડિગ્રી, રાજકોટ ૩૯.૬ ડિગ્રી, જામનગરમાં ૩પ.૬ ડિગ્રી તાપમાન નોંધાયું છે. ગરમીથી શહેરીજનોને આંશિક રાહત મળે તેવું હાલના તબક્કે લાગી રહ્યું છે.

હવામાન વિભાગ દ્વારા ગુજરાતના અમુક જિલ્લામાં ભારે પવનની સાથે ગાજવીજ વરસાદ પડી શકે તેવી આગાહી કરવામાં આવી છે. આજે આણંદ, દાહોદ, વડોદરા, છોટાઉદેપુર, નર્મદા, ભરૂચ, સુરત, નવસારી,વલસાડ, અમરેલી,ભાવનગર ગીરસોમનાથમાં વરસાદની આગાહી કરવામાં આવી છે.

બીજી તરફ આવતીકાલે વડોદરા, ભરૂચ, સુરત,વલસાડ, ભાવનગર, સોમનાથમાં વરસાદની આગાહી કરવામાં આવી છે.

હવામાન ખાતાની આગાહીના પગલે રાજ્યના વિવિધ વિભાગોમાં વરસાદનું આગમન થયું છે. જેના કારણે ભર ચૈત્રે અષાઢી માહોલ જામ્યો છેે. જેના કારણે એક તરફ ખેડૂતોની ચિંતામાં વધારો થયો છે, જ્યાં બીજી તરફ લોકોને ગરમીમાં રાહત મળી રહી છે.

દાહોદ, બનાસકાંઠા અને છોટાઉદેપુરના વિવિધ વિસ્તારોમાં ભારે પવન સાથે ધોધમાર વરસાદ પડ્યો છે. રાજ્યમાં ઉનાળામાં વરસાદની આગાહી કરવામાં આવી હતી. જેના વચ્ચે છોટા ઉદેપુરના કવાંટ પંથકમાં વરસાદી ઝાપટા જોવા મળ્યા છે. દાંતા તાલુકામાં વાતાવરણમાં પલટો આવ્યો અને અંબાજી, ભાણપુર અને હડાદ તેમજ આજુબાજુના વિસ્તારમાં વરસાદી માહોલ જામ્યો છે. કમોસમી વરસાદથી મકાઈ, તુવેરના ઊભા પાકને નુકસાન પહોંચ્યેં છે. જેથી ખેડૂતોની ચિંતા વધી છે.

જો આપને આ પોસ્ટ ગમી હોય તો શેર કરો...