જાંબુડા પાટીયા પાસે મોટરનો પીછો કરી એલસીબીએ પકડી દારૃની ૪૦૨ બોટલઃ બે દરોડામાં ૧૫ લાખથી વધુનો મુદ્દામાલ

Author: નોબત સમાચાર

જાંબુડા પાટીયા પાસે મોટરનો પીછો કરી એલસીબીએ પકડી દારૃની ૪૦૨ બોટલઃ બે દરોડામાં ૧૫ લાખથી વધુનો મુદ્દામાલ

ઠેબા બાયપાસ પાસે મોટરમાંથી મળી આવી ૨૪૬ દારૃની બોટલઃ

જામનગર તા. ૮ઃ જામનગરના ઠેબા બાયપાસ પાસેથી ગઈકાલે એલસીબીએ એક મોટરમાં લઈ જવાતી ઈંગ્લીશ દારૃની ૨૪૬ બોટલ કબજે કરી છે. ઝડપાયેલા આરોપીએ અન્ય બે આરોપીના નામ આપ્યા છે. જાંબુડાના પાટીયા પાસેથી એલસીબીએ એક મોટરમાં ઈંગ્લીશ દારૃની ૪૦૨ બોટલ લઈને જતા શખ્સને પીછો કરીને દબોચી લીધો છે. તેણે પણ એક સાગરિતનું નામ આપ્યું છે. કુલ રૃા.૧૫ લાખથી વધુનો મુદ્દામાલ બંને દરોડામાં કબજે કરાયો છે.

જામનગરના ખીજડિયા બાયપાસથી ઠેબા બાયપાસ વચ્ચે ઈંગ્લીશ દારૃની એક મોટરમાં હેરાફેરી થવાની છે તેવી બાતમી એલસીબીના મયુરસિંહ, યુવરાજસિંહ, ઋષિરાજસિંહને મળતા પીઆઈ વી.એમ. લગારીયાને તેનાથી વાકેફ કરાયા પછી પીએસઆઈ સી.એમ. કાંટેલીયા તથા પી.એન. મોરીના વડપણ હેઠળ એલસીબી સ્ટાફે વોચ ગોઠવી હતી.

તે દરમિયાન ઠેબા ચોકડી નજીકથી ફોર્ડ કંપનીની ફીયેસ્ટા મોડેલની જીજે-૧૦-એફ ૯૭૨૮ નંબરની મોટર પસાર થતાં એલસીબીએ તેને આંતરી લઈ તલાશી લીધી હતી. આ મોટરમાંથી ભારતીય બનાવટના અંગ્રેજી શરાબની ૨૪૬ બોટલ મળી આવી હતી. આ જથ્થા સાથે જામનગરના મચ્છરનગરમાં રહેતો યશપાલસિંહ નરેન્દ્રસિંહ જાડેજા ઉર્ફે ગડીયો નામનો શખ્સ મળી આવ્યો હતો. આ શખ્સની પૂછપરછ કરાતા તેણે પોતાના સાગરિત પુનીતનગરવાળા હિતેન્દ્રસિંહ વિક્રમસિંહ વાળા ઉર્ફે વેલ્ડીંગ તથા ઈનાયત ઈબ્રાહીમ મસીયાર ઉર્ફે તોતો ઉર્ફે ટાઈગરના નામ આપ્યા છે. એલસીબીએ દારૃનો જથ્થો, મોટર, એક મોબાઈલ મળી કુલ રૃા.૪,૭૫,૬૦૦નો મુદ્દામાલ કબજે કર્યાે છે.

ત્યારપછી સ્થાનિક ગુન્હાશોધક શાખાના એએસઆઈ દિલીપભાઈ તલાવડીયા, હિતેન્દ્રસિંહ, કાસમભાઈને બાતમી મળી હતી કે, ધ્રોલ તરફથી આવી રહેલી એક મોટરમાં ઈંગ્લીશ દારૃનો જથ્થો લાવવામાં આવી રહ્યો છે. તે બાતમીના આધારે પીઆઈ વી.એમ. લગારીયાની સૂચનાથી એલસીબી ટીમ જામનગર-રાજકોટ ધોરીમાર્ગ પર જાંબુડા ગામમના પાટીયા પાસે વોચમાં હતી. ત્યારે ત્યાંથી પસાર થયેલી મારૃતી સુઝૂકી કંપનીની બ્રેઝા મોટર પસાર થતાં તેને રોકવા ઈશારો કરાયો હતો. જેના પગલે આ મોટરના ચાલક જાંબુડા ગામનો વતની અને હાલમાં સુભાષબ્રિજ પાસે ભારતવાસમાં રહેતા કિશન નાથાભાઈ ગીગડ ઉર્ફે ડેન્કરે મોટર ભગાડી મૂકી હતી.

આ શખ્સે જાંબુડાના પાટીયાથી મોટર અલીયાબાડા તરફ ફૂલસ્પીડમાં વાળી લીધા પછી મિયાત્રા ગામ તરફ દોટ મૂકી હતી. તે મોટરનો એલસીબી ટીમે પીછો શરૃ કર્યા પછી મોટરને આંતરી લીધી હતી. તે મોટરની તલાશી લેવામાં આવતા તેમાંથી ભારતીય બનાવટના અંગ્રેજી શરાબની ૪૦૨ બોટલ મળી આવી હતી. એલસીબીએ મોટર, બોટલ, એક મોબાઈલ મળી કુલ રૃા.૧૧,૨૭,૬૦૦નો મુદ્દામાલ કબજે કરી કિશન ઉર્ફે ડેન્કરની અટકાયત કરી છે. આ શખ્સે ઈનાયત ઈબ્રાહીમ મસીયાર ઉર્ફે તોતો ઉર્ફે ટાઈગરનું નામ આપ્યું છે.

જો આપને આ પોસ્ટ ગમી હોય તો શેર કરો...