જામનગરમાં ર૪ કલાકમાં ૧.ર ડીગ્રી વધીને મહત્તમ તાપમાન ૩૯.૮ ડીગ્રીઃ લોકો ત્રાહિમામ્

Author: નોબત સમાચાર

જામનગરમાં ર૪ કલાકમાં ૧.ર ડીગ્રી વધીને મહત્તમ તાપમાન ૩૯.૮ ડીગ્રીઃ લોકો ત્રાહિમામ્

ભેજ ર૧ ટકા વધીને ૮૪ ટકાએ પહોંચતા વધ્યો બફારો

જામનગર તા. ૧૭: જામનગરમાં આજે સવારે પૂરા થતાં ચોવીસ કલાક દરમિયાન ૧.ર ડીગ્રીના વધારા સાથે મહત્તમ તાપમાન ૩૯.૮ ડીગ્રીએ પહોંચી ગયું હતું. ર૧ ટકાના વધારા સાથે વાતાવરણમાં ભેજનું પ્રમાણ ૮૪ ટકા રહ્યું હતું. તાપમાનમાં થયેલા વધારા અને ભેજના વધુ પ્રમાણના પગલે પ્રજાજનો આકરા તાપ અને બફારાથી ત્રાહિમામ્ પોકારી ઊઠ્યા હતાં.

જામનગરમાં વાદળોના આવાગમન વચ્ચે તાપમાનમાં સતત વધારો થઈ રહ્યો છે. ગત્ પાંચ દિવસમાં તાપમાનમાં ૩.૧ ડીગ્રીનો વધારો થયો હતો, અને આજે સવારે પૂરા થતાં ચોવીસ કલાક દરમિયાન ૧.ર ડીગ્રીના વધારા સાથે મહત્તમ તાપમાન ૩૯.૮ ડીગ્રી અને અડધો ડીગ્રી વધીને લઘુતમ તાપમાન ર૯ ડીગ્રી નોંધાયું હતું. વાતાવરણમાં ભેજનું પ્રમાણ ર૧ ટકા વધીને ૮૪ ટકાએ પહોંચી ગયું હતું.

નગરમાં મહત્તમ તાપમાન ૪૦ ડીગ્રી નજીક પહોંચી જતાં જનતાએ ગઈકાલે આકરા તાપનો અનુભવ કર્યો હતો. બપોરે નભમાંથી અગનવર્ષા થઈ રહી હોય તેવું લાગી રહ્યું હતું. વાતાવરણમાં ભેજનું પ્રમાણ પણ ખૂબ વધુ રહેતા ગરમી સાથે બફારાનું પણ મિશ્રણ થયું હતું. ગઈકાલે સવારથી જ બફારો અનુભવાઈ રહ્યો હતો. ગરમી અને બફારાથી પરશેવે રેબઝેબ થઈ આકૂળ-વ્યાકૂળ બની ગયેલા પ્રજાજનો ત્રાહિમામ્ પોકારી ઊઠ્યા હતાં. ગરમી સામે રક્ષણ મળે તે માટે લોકોએ એસી, એરકૂલર તથા ઠંડાપીણાનો સહારો લીધો હતો.

પવનની ગતિ પ્રતિ કલાકની સરેરાશ ૩૦ થી ૩પ કિ.મી.ની રહેવા પામી હતી. ગઈકાલે સાંજે વાતાવરણમાં પલટો આવ્યો હતો. તેજીલા વાયરાઓ વચ્ચે વરસાદ પડતા વાતાવરણમાં ઠંડક પ્રસરી હતી. જેના પગલે ગરમી અને બફારામાંથી રાહત મળી હતી.

જો આપને આ પોસ્ટ ગમી હોય તો શેર કરો...