નવાગામમાં કંપનીના ચાલતા કામના સ્થળેથી પોણા છ લાખના મશીનની ચોરી

Author: નોબત સમાચાર

નવાગામમાં કંપનીના ચાલતા કામના સ્થળેથી પોણા છ લાખના મશીનની ચોરી

કોન્ટ્રાક્ટર પેઢીના કર્મચારીએ કરી ફરિયાદઃ

જામનગર તા.રપ : લાલપુરના નવાગામમાં ખાનગી કંપનીના ચાલી રહેલા કામના એક સ્થળેથી સર્વે કરવા માટે રાખવામાં આવેલુ રૂ.પ લાખ ૭૮ હજારની કિમતનું મશીન બે સપ્તાહ પહેલાં ચોરાઈ ગયાની કોન્ટ્રાક્ટર પેઢીના કર્મચારીએ પોલીસમાં ફરિયાદ નોંધાવી છે.

લાલપુર તાલુકાના નવાગામના સીમ વિસ્તારમાં ખાનગી કંપનીના સોલાર વિભાગમાં પોલિસીલીકોન એરીયામાં ચાલુ મહિનાની તા.૪ના દીને ચાલી રહેલા કામના સ્થળે ચોરી થયાની મેઘપર પોલીસ સ્ટેશનમાં ફરિયાદ કરવામાં આવી છે.

આ કંપની પાસેથી કોન્ટ્રાકટ મેળવનાર માધવ કન્સ્ટ્રક્શન એન્ડ સર્વેયર નામની પેઢીના કર્મચારી કલ્યાણપુર તાલુકાના મોટા આસોટા ગામના પ્રવીણભાઈ ડી. વરવારીયાએ પોલીસ ફરિયાદમાં જણાવ્યા મુજબ તા.૪ની સાંજથી તા.પની સવાર સુધીમાં સર્વે કરવા માટે રાખવામાં આવેલુ ટોપક્રોન રીફલેકટ્રોલેસ ઈલેકટ્રોનિક્સ ટોટલ સ્ટેશન કંપનીનું જીએએમ ૧૦૧ મોડેલનું મશીન ચોરાઈ ગયું છે.

ત્યાં પાઈપના થાંભલા માટે બીમ ઉભા કરવાની ચાલી રહેલી કામગીરીના સર્વે માટે માધવ કન્સ્ટ્રક્શન એન્ડ સર્વેયર પેઢીને કામ મળ્યું છે જ્યાં તેઓ ઉપરોક્ત મશીન રાખી સર્વે કરાવતા હતા અને બનાવની સાંંજે તેઓએ રૂ.૫ લાખ ૭૮ હજારની કિંમતનું આ મશીન એક કન્ટેઈનરમાં રાખ્યું હતું ત્યાંથી ઉપડી ગયું છે. મેઘપર પોલીસે ગુન્હો નોંધી અજાણ્યા તસ્કરના સગડ દબાવ્યા છે.

જો આપને આ પોસ્ટ ગમી હોય તો શેર કરો...