કાલાવડના રીનારી ગામના ખેતરમાંથી દારૂની નાની મોટી ૧૪૫૨ બોટલ ઝડપાઈ

Author: નોબત સમાચાર

કાલાવડના રીનારી ગામના ખેતરમાંથી દારૂની નાની મોટી ૧૪૫૨ બોટલ ઝડપાઈ

પકડાયેલા આરોપીએ સાગરિતનું નામ આપ્યું

જામનગર તા. ૧૦ઃ કાલાવડ તાલુકાના રીનારીમાં એક ખેતરમાંંથી પોલીસે દરોડો પાડી અંંગ્રેજી શરાબની ૪૯૨ મોટી બોટલ તથા ૯૬૦ ચપલા કબજે કર્યા છે. આ જથ્થા સાથે ઝડપાયેલા શખ્સે પોતાના સાગરિતનું નામ આપ્યું છે. કુલ ₹ ૪,૩૮,૫૦૦નો મુદ્દામાલ કબજે કરવામાં આવ્યો છે. હાપા પાસેથી શખ્સ બોટલ સાથે પકડાયો છે.

કાલાવડ તાલુકાના રીનારી ગામમાં આવેલા એક ખેતરમાં ઈંગ્લીશ દારૂનો જથ્થો પડ્યો હોવાની બાતમી કાલાવડ ગ્રામ્ય પોલીસ સ્ટેશનના કુલદીપસિંહ, અલ્તાફ સમાને મળતા પીએસઆઈ વી.એ. પરમાર તથા સ્ટાફે ગઈકાલે બપોરે રીનારી ગામની સીમમાં આવેલા મનોજ દેવશીભાઈ સીયાણી નામના શખ્સના ખેતરમાં દરોડો પાડી તલાશી લીધી હતી.

આ ખેતરમાંથી ભારતીય બનાવટના અંગ્રેજી શરાબની બે બ્રાંડની ૪૯૨ મોટી બોટલ તથા ૯૬૦ નંગ નાની બોટલ મળી આવી હતી. પોલીસે ₹ ૪ લાખ ૩૮ હજારની કિંમતનો શરાબનો જથ્થો તથા એક મોબાઈલ કબજે કરી મનોજ દેવશીભાઈની ધરપકડ કરી છે. આ શખ્સની પૂછપરછ કરાતા તેણે પોતાના સાગરીત કાલાવડ તાલુકાના મુળીલા ગામના મહિપાલસિંહ મહેન્દ્રસિંહ જાડેજા ઉર્ફે કાનાનું નામ આપ્યું છે. પોલીસે બંને સામે દારૂબંધી ભંગ અંગે ગુન્હો નોંધ્યો છે.

જામનગર નજીકના હાપા પાસે એલ્ગન સોસાયટીમાંથી ગઈકાલે રાત્રે પસાર થતાં હાપાની વેલનાથ સોસાયટી વાળા જતીન ભૂપતભાઈ ડાભી નામના શખ્સને પોલીસે રોકી ચેક કરતા આ શખ્સના કબજામાંથી દારૂની એક બોટલ મળી આવી હતી.

જો આપને આ પોસ્ટ ગમી હોય તો શેર કરો...