કુંભારવાડામાં મકાનમાંથી મળ્યા બીયરના ૨૪ ટીનઃ આરબલુસમાંથી ૧૧ બોટલ કબજે

Author: નોબત સમાચાર

કુંભારવાડામાં મકાનમાંથી મળ્યા બીયરના ૨૪ ટીનઃ આરબલુસમાંથી ૧૧ બોટલ કબજે

ખુલ્લા ફાટક પાસેથી દારૂના છ પાઉચ ઝડપાયાઃ

જામનગર તા. ૫: જામનગરના નાગનાથ નાકા નજીક કુંભારવાડામાં એક મકાનમાંથી એલસીબીએ બીયરના ૨૪ ટીન પકડી પાડ્યા છે. દિગ્જામ વુલન મીલ પાસે ખુલ્લા ફાટક નજીકથી એક શખ્સ દારૂના છ પાઉચ સાથે ઝડપાયો છે. જામનગરમાં રહેતા એક શખ્સના આરલબુસ સ્થિત મકાનમાંથી ૧૧ બોટલ દારૂ પકડી પાડવામાં આવ્યો છે.

જામનગરના નાગનાથ નાકા વિસ્તારમાં આવેલા કુંભાર વાડા નજીક એક મકાનમાં દારૂનો જથ્થો પડયો હોવાની બાતમી એલસીબીના હરદીપ બારડ, મયુરસિંહ, ઋષિરાજ સિંહને મળતા પીઆઈ વી.એમ. લગારીયાને વાકેફ કરાયા પછી ગઈકાલે રાત્રે એલસીબી સ્ટાફે ત્યાં આવેલા મામદ કાસમ હાલાણીના મકાનમાં દરોડો પાડયો હતો. તે મકાનમાંથી બીયરના ૨૪ ટીન મળી આવ્યા હતા. દરોડા પહેલાં મામદ કાસમ નાસી ગયો હતો. એલસીબીએ ટીન કબજે કરી મામદ સામે સિટી-એ ડિવિઝન પોલીસ સ્ટેશનમાં ગુન્હો રજીસ્ટર કરાવ્યો છે.

જામનગરના દિગ્જામ વુલન મીલ નજીક ખુલ્લા ફાટક પાસેથી ગઈકાલે રાત્રે જઈ રહેલા હનુમાન ટેકરીવાળા મનિષ જેઠાભાઈ વાઘેલા નામના શખ્સને પોલીસે રોકાવી તલાશી લેતા તેના કબજામાંથી ઈંગ્લીશ દારૂના છ પાઉચ મળી આવ્યા હતા. પોલીસે પાઉચ કબજે કરી મનિષની પૂછપરછ કરતા તેણે હનુમાન ટેકરીમાં રહેતા અશ્વિન ડાયાભાઈ શેખવા પાસેથી પાઉચ લીધાની કબૂલાત કરી હતી.

લાલપુર તાલુકાના આરબલુસ ગામમાં અશોક ખીમજીભાઈ ગડારા નામના હાલમાં જામનગરની મયુર ટાઉનશીપમાં રહેતા શખ્સના મકાનમાં ગઈકાલે રાત્રે લાલપુર પોલીસ સ્ટેશનના સ્ટાફે દરોડો પાડતા ત્યાંથી વોડકાની ૧૧ બોટલ મળી આવી હતી. પોલીસે અશોકની ધરપકડ કરી પૂછપરછ હાથ ધરી છે.

જો આપને આ પોસ્ટ ગમી હોય તો શેર કરો...